15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Իրանի ԱԳ նախարարը հայտարարել է, որ Թեհրանը «հասկանում է Սիրիայում Թուրքիայի նոր ռազմական գործողության անհրաժեշտությունը»
Քաղաքականություն
28.06.2022 | 16:51
Իրանի ԱԳ նախարար Հոսեյն Ամիր Աբդոլլահիանն Անկարայում հայտարարել է, որ Թեհրանը չի ընդդիմանա Սիրիայում Թուրքիայի նոր ռազմական գործողությանը՝ ուղղված քուրդ զինյալների դեմ։ Այս մասին գրում է Al Arabiya-ն՝ վկայակոչելով AFP-ն։
«Մենք շատ լավ հասկանում ենք Թուրքիայի անվտանգության մտահոգությունները։ Մենք հասկանում ենք, որ, միգուցե, հատուկ գործողություն կարող է անհրաժեշտ լինել։ Թուրքիայի անվտանգային մտահոգությունները պետք է ամբողջությամբ և մշտապես լուծվեն»,- ասել է Իրանի ԱԳ նախարարը իր թուրք գործընկեր Մևլութ Չավուշօղլուի հետ բանակցություններից հետո։
Թուրքիայի նախագահ Ռեջեփ Թայիփ Էրդողանը վերջին մի քանի շաբաթվա ընթացքում նախազգուշացրել է, որ շուտով կարող է նոր հարձակում սկսել Սիրիայում քուրդ զինյալների դեմ։ Այն ներառում է նաև ԱՄՆ-ի աջակցությունը վայելող քրդական Ժողովրդի պաշտպանության ստորաբաժանումները (YPG)։
Վաշինգտոնն ու Մոսկվան արդեն իսկ զսպվածության կոչ են արել Թուրքիային։
Նշենք, որ Իրանը Սիրիայի նախագահ Բաշար Ասադի գլխավոր դաշնակիցն է, միաժամանակ, Թուրքիայի համար կարևոր առևտրային գործընկեր:
Էմմա Չոբանյան
