Առայժմ չենք կարողանում համաձայնության գալ ճանապարհների օգտագործման իրավական ընթացակարգերի հարցով․ Փաշինյան․ ՏԵՍԱՆՅՈւԹ

«Այո, ես հաստատում եմ, բրյուսելյան հանդիպման ժամանակ Ադրբեջանի նախագահը Եվրամիության խորհրդի նախագահի և իմ ներկայությամբ խոստացել էր, որ գերիներ ազատ կարձակվեն։ Բայց մեր հաջորդ հանդիպմանն արձանագրեցինք, որ այդ խոստումը չի կատարվել»,- այսօր հրավիրած առցանց ասուլիսում ասաց վարչապետ Նիկոլ Փաշինյանը։

Նրա խոսքով՝ խոստումը հնչեցել է, բայց չի կատարվել։ «Ադրբեջանի ղեկավարն էլ փորձ արեց ինձ վերագրել խոստում, թե ես էլ ինչ-որ բան եմ խոստացել, մասնավորապես, տարածաշրջանի կոմունիկացիների երթուղու հետ կապված, թե իբր ես խոստում եմ տվել, որ երթուղու հետ կապված կոնկրետ կոորդինատներ կներկայացնեմ։ Բայց այդպիսի խոստում ես չեմ տվել, որովհետև մեր դիրքորոշումը հետևյալն է՝ մենք երթուղիներ կսկսենք քննարկել միայն այն բանից հետո, երբ իրավական կարգավորումների շուրջ կգանք ընդհանուր հայտարարի։

«Մենք երթուղիներ կսկսենք քննարկել միայն այն բանից հետո, երբ իրավական կարգավորումների շուրջ կգանք ընդհանուր հայտարարի»,-ասաց նա՝ հավելելով, որ  բացվող ճանապարհները պետք է գտնվեն այն երկրների իրավազորության ներքո, որոնցով անցնում են։

Նիկոլ Փաշինյանի խոսքով՝ Հայաստանի և Ադրբեջանի միջև երթուղիների ընտրությունն իրականանում այդքան էլ մեծ չէ։

«Մենք գործնականում ունենք մի 3-4, մաքսիմում 5 տարբերակ, և դրանից մեկը պետք է ընտրենք։ Երթուղին տեխնիկական հարց է, և հաճախ  փորձ է արվում քաղաքականացնել։ Երթուղիների հարցում ոչ մեկ մեզնից ավելի շահագրգիռ չի կարող լինել,որովհետև մենք խնդիր ունենք այդ ճանապարհներով ուղղորդել հնարավորինս մեծ միջազգային տարանցում, որը պետք է եկամուտներ բերի ՀՀ-ին»,-ընդգծեց Նիկոլ Փաշինյանը՝ հավելելով, որ Ադրբեջանը փորձում է հարցը լուծել այնպես, որ Հայաստանը շարունակի մնալ շրջափակման մեջ:

Մանրամասները՝ տեսանյութում: