Ռուսական բանակի կախվածությունը պահեստազորի ուժերից կմեծանա․ բրիտանական հետախուզություն

Մեծ Բրիտանիայի Պաշտպանության նախարարությունը հետախուզական նոր տվյալներ է ներկայացրել Ուկրաինայում ռազմական գործողությունների վերաբերյալ, գրում է BBC-ի ռուսական ծառայությունը։

Նշվում է, որ մինչ ռուսական ուժերի հիմնական ուշադրությունը մնում է Սևերոդոնեցկի և Լիսիչանսկի շուրջ, մեկ շաբաթ շարունակվող մյուս շրջանների ուժեղ հրետակոծությունը ցույց է տալիս, որ Ռուսաստանն այժմ փորձում է թափ հավաքել հյուսիսային Իզյումի ուղղությամբ։ Ուկրաինական ուժերը շարունակում են գիծը պահել՝ արդյունավետ օգտվելով անտառապատ տարածքից:

«Առաջիկա շաբաթներին ռուսական հետագա արշավի կախվածությունը պահեստային ուժերից, ամենայն հավանականությամբ, զգալիորեն կաճի: Ռուսաստանն ավելի է ապավինելու լրացուցիչ էշելոններին։ Այդ ուժերը կազմված են մի շարք մասերից, իսկ Ռուսաստանը, հավանաբար, արդեն իսկ սկսել է տեղակայել դրանք»,- նշել է բրիտանական հետախուզությունը։

Բրիտանիայի ՊՆ-ն հայտնել է նաև, որ ռուսական բանակում կա նորամուծություն՝ կամավոր պահեստազորայիններ, որոնք կես դրույքով են ծառայություն անցնում։ Նրանք գործում են որպես ստորաբաժանումներ, որոնք սովորաբար նշանակված են թիկունքի պաշտպանությունն իրականացնելու համար: Ինչ վերաբերում է մարտական ​​անձնակազմին, ապա նրանք ռուսական զորքերի պոտենցիալ մոբիլիզացիայի ենթակա վետերաններն են, որոնք ծառայել են կանոնավոր զինված ուժերում վերջին հինգ տարիներին։ Նշվում է նաև, որ չնայած Ուկրաինա ուղարկվող կադրերի մշտական ​​սղությանը՝ ՌԴ ղեկավարությունը դեռ չի շտապում համընդհանուր մոբիլիզացիա հայտարարել։

Էմմա Չոբանյան