20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
30 թափուր աշխատատեղ․ Գյումրու քաղաքապետարանը հավաքարարների ու բանվորների հաստիքները չի կարողանում համալրել
Հասարակություն
25.06.2022 | 16:47
Գյումրու քաղաքապետարանի կոմունալ ծառայությունում 30 թափուր հաստիք կա, սակայն քաղաքային իշխանությունը չի կարողանում կադրեր գտնել։ Խոսքը սանմաքրման, ինչպես նաև կանաչապատման ծառայության բանվորների մասին է։
Գյումրու քաղաքապետարանի կոմունալ ծառայության բյուջետային հիմնարկի տնօրենի պաշտոնակատար Արման Շաբոյանից հետաքրքրվեցինք, թե ո՞րն է պատճառը, որ չեն կարողանում գտնել համապատասխան կադրեր՝ ցածր աշխատավա՞րձը, թե՞ մենաթալիտետը.
«Աշխատավարձը 80-85 հազար դրամ, հարկերը՝ 115 հազար 500 դրամ։ Շատ քիչ են դիմողներն, թեև այս տարվա հունվարից ավելացրել ենք աշխատավարձը։ Վերջերս էլ 10 տոկոս ավելացրեցինք, բայց էլի չեն դիմում․ ամիսը կարող է մեկ կամ լավագույն դեպքում երկու հոգի դիմել։
Քաղաքապետարանի պաշտոնյան ասաց,որ նույնիսկ կանգառներում են հայտարարություններ փակցնում։
«Հեռուստատեսությամբ հայտարարություն տալուց բացի պարբերաբար այլ միջոցների ենք դիմում՝ փակցնում ենք կանգառներում կամ մեր ունեցած հավաքարարներին ենք խնդրում ծանոթներին, բարեկամներին, հարևաններին ասել, որ գան, ընդունվեն աշխատանքի։ Մեկն իր հարևանին է ասում, մյուսը՝ բարեկամին։ Էդ տարբերակով մի քանի հոգի եկավ եղանակները տաքանալուց հետո, ցրտերին չեն գալիս։ Բայց դեռ 30 աշխատակցի կարիք ունենք։
Չնայած բոլոր տեղերում է այդպես․ երեկ մի ծրագրի էինք մասնակցում Վանաձորի, Դիլիջանի կոմունալ բաժնի պետերի հետ, իրենք էլ նույնն էին ասում, որ չեն գալիս, չեն ընդունվում աշխատանքի»։
Արման Շաբոյանն ասաց, որ մի ժամանակ էլ աղբատարի վարորդների մեծ կարիք կար, բայց հիմա կարգավորվել է․ նոր մեքենաներ են ձեռք բերել, աշխատաժամերն են հստակեցրել, աշխատավարձն են բարձրացրել։
«Դիմողներ կան, գալիս, ասում են՝ ուզում ենք ընդունվել, տվյալներ ենք գրանցում, որ հենց թափուր տեղ լինի, փոխարինողներ ունենանք»,- ասաց Արման Շաբոյանը։
Արմիկ Մովսիսյան
