05.05.2024 | 14:33
«Տավուշը հանուն հայրենիքի» շարժման երթը հասել է Դիլիջան
Թուրքիայի Արդարադատության նախարարությունը կանաչ լույս է տվել Դիարբեքիրի փաստաբանների՝ Հայոց ցեղասպանության մասին հայտարարության հետաքննությանը
Քաղաքականություն
24.06.2022 | 21:36
Թուրքիայի Արդարադատության նախարարությունը թույլատրել է Դիարբեքիրի փաստաբանների ասոցիացիայի ղեկավարների նկատմամբ հետաքննություն իրականացնել` կապված ապրիլի 24-ին Հայոց ցեղասպանության մասին արված հայտարարության հետ, գրում է Duvar-ը։
Փաստաբանների միության ղեկավար Նաթիհ Էրենը և 10 այլ ղեկավարներ կկանգնեն դատարանի առջև Թուրքիայի քրեական օրենսգրքի 301-րդ հոդվածի համաձայն, որն անօրինական է համարում Թուրքիային, թուրք ազգին, թուրքական պետական կառույցներին կամ թուրք ազգային հերոսներին վիրավորելը:
Հիշեցնենք, որ Դիարբեքիրի փաստաբանների ասոցիացիան ապրիլի 24-ին հայտարարություն էր տարածել՝ «Մենք կիսում ենք մեծ աղետի ցավը» վերնագրով։ Հայտարարության մեջ թուրքական կառավարությանը կոչ էր արվում սկսել «ճշմարտության բացահայտման գործընթացը, որպեսզի մեր հայ հարևանների հոգիները խաղաղության հասնեն»։
Սա առաջին դեպքը չէ, երբ Դիարբեքիրի փաստաբանների միությունը հետաքննության է ենթարկվում ապրիլի 24-ի Հայոց ցեղասպանության հիշատակի օրվա հայտարարության առնչությամբ։ Նրա ղեկավարները հետաքննվել էին 2016 և 2018 թվականներին նույն հարցի վերաբերյալ իրենց հայտարարությունների համար, սակայն դատարանները նրանց արդարացրել էին այն վճռով, որ «Հայոց ցեղասպանություն ասելը հանցագործություն չէ»:
Էմմա Չոբանյան
