19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
Բայդենի ու Էրդողանի խորհրդականները քննարկել են ՆԱՏՕ-ի ընդլայնումն ու իրավիճակն Ուկրաինայում
Քաղաքականություն
24.06.2022 | 18:49
Թուրքիայի նախագահի խոսնակ և արտաքին քաղաքականության հարցերով նախագահի գլխավոր խորհրդական Իբրահիմ Քալընը և ԱՄՆ նախագահի ազգային անվտանգության հարցերով խորհրդական Ջեյք Սալիվանը նախօրեին հեռախոսազրույց են ունեցել և հիմնականում քննարկել Շվեդիայի և Ֆինլանդիայի՝ ՆԱՏՕ-ին անդամակցելու և ուկրաինական հացահատիկի արտահանման ծրագրերը, գրում են թուրքական լրատվամիջոցները։
Բացի երկկողմ քաղաքական և տնտեսական հարաբերություններից` երկու պաշտոնյաները քննարկել են Թուրքիայի դերը ՆԱՏՕ-ում և նրա ներդրումը դաշինքում, ՆԱՏՕ-ի գագաթնաժողովը Մադրիդում, Շվեդիայի և Ֆինլանդիայի ՆԱՏՕ-ին դիմելու գործընթացը, հացահատիկի առաքումը Սև ծովով և տարածաշրջանային այլ խնդիրներ։
Զրուցակիցներն ընդգծել են Թուրքիայի առանցքային դերը ՆԱՏՕ-ում և մտքեր փոխանակել դաշինքի նոր ռազմավարական հայեցակարգի, ուկրաինական պատերազմի, ահաբեկչության դեմ պայքարի, պարենային ճգնաժամի և անվտանգության այլ հարցերի շուրջ, որոնք քննարկվելու են Մադրիդի գագաթնաժողովում։
Քալընը փոխանցել է, որ Շվեդիան և Ֆինլանդիան պետք է արդարացնեն Թուրքիայի ակնկալիքները ահաբեկչության դեմ պայքարում և ընդգծել, որ որևէ առաջընթաց չի կարող լինել, եթե կոնկրետ քայլեր չձեռնարկվեն։
Նա ընդգծել է, որ PKK/PYD/YPG-ի կողմնակիցների կողմից «ահաբեկչական կազմակերպության քարոզչությունը Ստոկհոլմում և ԶԼՄ-ների միջոցով, քանի դեռ շարունակվում են Թուրքիայի բանակցությունները Շվեդիայի և Ֆինլանդիայի հետ, անընդունելի է։
Նա նշել է, որ Թուրքիան շարունակում է իր բանակցությունները Ուկրաինայի և Ռուսաստանի հետ Սև ծովով հացահատիկի առաքման համար անվտանգ միջանցք ստեղծելու շուրջ։
Էմմա Չոբանյան
