08.06.2026 | 06:48
1299 ընտրատեղամասերում քվեարկության նախնական արդյունքները․ ԿԸՀ
Ռուսական նավատորմին հանձնարարվել է ականապատել Ուկրաինայի նավահանգիստները․ The Guardian
Քաղաքականություն
24.06.2022 | 22:28
Ռուսաստանի իշխանությունները Սևծովյան նավատորմին հրահանգել են ականապատել Օդեսայի և Օչակովի նավահանգիստները։ Այս մասին հունիսի 23-ին հայտնել է The Guardian թերթը՝ վկայակոչելով ԱՄՆ հետախուզության տվյալները։
Ստացված տեղեկությունների համաձայն՝ նշաններ կան, որ ռուսական ուժերն ականներ են կիրառում Սև ծովում և ավելի վաղ ականապատել են Դնեպր գետը։
«Մենք կարող ենք հաստատել, որ չնայած ռուսական հրապարակային հայտարարություններին, որ նա չի ականապատում Սև ծովի հյուսիս-արևմտյան հատվածը, իրականում ռուսական զորքերը ականներ են տեղադրում Սև ծովում՝ Օչակովի մոտ», – ասել է ամերիկացի պաշտոնյան։
Նշվում է, որ Մոսկվան հերքում է Սև ծովում ուկրաինական նավահանգիստների ծովային առևտրի դադարեցման փաստը՝ դրանում մեղադրելով Կիևին։ Միաժամանակ ԱՄՆ-ն ունի տվյալներ, որոնք վկայում են «Ուկրաինայի վերահսկողության տակ գտնվող ափի մի հատվածը կտրելու ռուսական համակարգված ռազմավարության մասին»։
«Ռուսաստանի գործողությունների ազդեցությունը, որը հանգեցրեց ծովային առևտրի դադարեցմանը Սև ծովի հյուսիսային երրորդ մասում և այս տարածաշրջանը դարձրեց անապահով նավագնացության համար, չի կարելի թերագնահատել, քանի որ Ուկրաինայի ծովային արտահանումը կենսական նշանակություն ունի համաշխարհային պարենային անվտանգության համար»,- ասել է ամերիկացի պաշտոնյան։
Հիշեցնենք, որ Ռուսաստանը ժամանակավորապես օկուպացված տարածքներից արտահանում է ուկրաինական հացահատիկ և մետաղ։
Տաթև Ֆռանգյան
