28.06.2026 | 18:42
Սաուդյան Արաբիայում ուղղաթիռի կործանման հետևանքով 14 մարդ է զոհվել
Սլուցկին չի բացառել ԵԱՀԿ Խորհրդարանական վեհաժողովից Ռուսաստանի հեռանալը
Քաղաքականություն
22.06.2022 | 16:56
Եվրոպայի անվտանգության և համագործակցության կազմակերպության Խորհրդարանական վեհաժողովից (ԵԱՀԿ ԽՎ) Ռուսաստանի Դաշնության դուրս գալը դեռևս չի քննարկվում, սակայն եթե փորձեր լինեն կասեցնել Ռուսաստանի մասնակցությունն այդ կազմակերպությանը, ապա Մոսկվան իրեն իրավունք է վերապահում լքել այն։ ՌԻԱ Նովոստիի փոխանցմամբ՝ այս մասին հայտարարել է ՌԴ Պետդումայի միջազգային հարցերով հանձնաժողովի ղեկավար Լեոնիդ Սլուցկին Telegram-ի իր ալիքում։
Ավելի վաղ Դաշնային խորհրդի արտաքին հարաբերությունների հանձնաժողովի նախագահի առաջին տեղակալ Վլադիմիր Ջաբարովը հայտարարել էր, որ Մեծ Բրիտանիան մերժել է ԵԱՀԿ Խորհրդարանական վեհաժողովի ռուսական պատվիրակության անդամներին մուտքի արտոնագիր տրամադրել՝ մասնակցելու հերթական նստաշրջանին։ ԵԱՀԿ ԽՎ նիստը նախանշված է հուլիսի 2-6-ը Բիրմինգհեմում։
Նրա խոսքով՝ Ռուսաստանն օրինական չի ճանաչի Մեծ Բրիտանիայում ԵԱՀԿ ԽՎ նստաշրջանի որոշումները, որոնց մասնակցելու համար ռուսական պատվիրակության անդամները վիզա չեն ստացել, միևնույն ժամանակ, Մոսկվան աննպատակահարմար է համարում հրաժարվել ԵԱՀԿ ԽՎ-ում աշխատելուց։
«Առայժմ մենք չենք քննարկում Խորհրդարանական վեհաժողովից դուրս գալու հարցը, սակայն հետագա դիրքորոշումը կախված է նրանից, թե ԵԱՀԿ ԽՎ-ն որքանով կկարողանա զսպել բացահայտ քաղաքականությունն ու ռուսատյացությունն իր հարթակում։ Եթե փորձեր լինեն ճզմելու կամ կասեցնելու Ռուսաստանի մասնակցությունն այս միջխորհրդարանական կազմակերպությանը, մենք մեզ իրավունք ենք վերապահում լքել այն»,- գրել է Սլուցկին։
Տաթև Ֆռանգյան
