08.06.2026 | 10:04
Ամփոփվել են 2005 ընտրատեղամասերից ստացված նախնական արդյունքները. ԿԸՀ
Ուկրաինացի լրագրող Մաքս Լևինը, որը մահացել է գարնանը Կիևի մերձակայքում, կարող էր մահապատժի ենթարկվել ռուս զինվորականների կողմից. JSF
Քաղաքականություն
22.06.2022 | 17:45
Մարտին Ուկրաինայի Կիևի մարզի Վիշգորոդսկի շրջանում մահացած ուկրաինացի ֆոտոլրագրող Մաքս Լևինին, ինչպես նաև նրան ուղեկցող ուկրաինացի զինվորական Ալեքսեյ Չերնիշևին, հնարավոր է, ռուս զինվորականները մահապատժի են ենթարկել, իսկ նրանց մահվանը կարող էին նախորդել հարցաքննություններ և խոշտանգումներ։ Նման եզրակացության է հանգել «Լրագրողներ առանց սահմանների» (JSF) կազմակերպության ներկայացուցիչը, որը մայիսի 24-ից հունիսի 3-ը գտնվում էր Ուկրաինայում՝ հետաքննելու Լևինի մահը։
Լևինն ու Չերնիշևը դադարել են կապի դուրս գալ մարտի 13-ին։ Լևինի մարմինը հայտնաբերվել է ապրիլի 1-ին։ Ուկրաինական լրատվամիջոցները չէին հայտնել Չերնիշևի ճակատագրի մասին, սակայն «Լրագրողներ առանց սահմանների» կազմակերպությունն իր զեկույցում նշում է, որ նրա մարմինը հայտնաբերվել է Լևինի դիակի հետ միասին։
Լրագրողները գտել են Լևինի մահվան վայրը Կիևից հյուսիս գտնվող Մոշչուն գյուղի մոտակայքում, որտեղ դեռևս կանգնած է նրա ածխացած Ford-ը։ «Լրագրողներ առանց սահմանների» կազմակերպությունը մեքենայի վրա 14 փամփուշտ է հայտնաբերել, ինչպես նաև մի քանի փամփուշտների հետ միասին՝ Չերնիշևի անձը հաստատող փաստաթղթեր։
Նրանք նաև հայտնաբերել են «ԴՆԹ-ի հնարավոր հետքերով մի քանի իրեր, որոնք վկայում են ռուս զինվորականների ներկայության մասին այն վայրի անմիջական մերձակայքում, որտեղ սպանվել են Լևինն ու Չերնիշևը»։ Մետաղորսիչ սարքի օգնությամբ որոնողական աշխատանքների վերջին փուլում հայտնաբերվել է փամփուշտը, որը, հավանաբար, դիպել է Լևինին։
«Հանցագործության վայրից լուսանկարների վերլուծությունը, դեպքի վայրում կատարված դիտարկումները և առգրավված իրեղեն ապացույցները հստակ մատնանշում են կրակոցների մասին, որին կարող էին նախորդել հարցաքննությունները կամ նույնիսկ խոշտանգումները»,- ասել է «Լրագրողներ առանց սահմանների» կազմակերպության գլխավոր քարտուղար Քրիստոֆ Դելուարը:
Մաքս Լևինը մեկն է այն ութ լրագրողներից, որոնք մահացել են ուկրաինական պատերազմը լուսաբանելիս։ Լրագրողների շրջանում վերջին զոհը ֆրանսիացի տեսաթղթակից Ֆրեդերիկ Լեկլերկ-Իմհոֆն էր, որը մահացել է մայիսի 30-ին Լուգանսկի շրջանում ռուս զինվորականների գնդակոծության արդյունքում։
Տաթև Ֆռանգյան
