Գերմանիան չի միանա Միջուկային զենքի արգելման մասին պայմանագրին

Գերմանիայի կառավարությունը բացառում է Միջուկային զենքի արգելման մասին պայմանագրին միանալը։ Նման քայլը անհամատեղելի կլինի Գերմանիայի՝ ՆԱՏՕ-ին անդամակցությունից բխող պարտավորությունների հետ, զինաթափումը պետք է իրականացվի՝ հաշվի առնելով անվտանգության քաղաքականության ոլորտում ստեղծված իրավիճակը։ Այս մասին ասվում է Գերմանիայի կառավարության՝ Բունդեսթագի Ձախ կուսակցության պատգամավոր Սևիմ Դաղդելենի հարցման պատասխանում, փոխանցում է DW-ի ռուսական ծառայությունը։

Ուկրաինայի վրա Ռուսաստանի հարձակումը ցույց է տալիս Մոսկվայից եկող սպառնալիքները, ասվում է փաստաթղթում։ Միևնույն ժամանակ, Գերմանիայի կառավարությունն ընդգծել է իր հավատարմությունն առանց միջուկային աշխարհի գաղափարին։

Միջուկային զենքի արգելման մասին պայմանագիրն ուժի մեջ է մտել 2021 թվականի հունվարին։ Այս արգելքը ներառում է միջուկային զենքի մշակումը, փորձարկումը, պահեստավորումը, ձեռքբերումը, փոխադրումը և օգտագործումը։ Պայմանագրին արդեն միացել է 65 երկիր, սակայն «միջուկային ակումբի» երկրներից և ոչ մեկը, որի մեջ են ԱՄՆ-ը, Ռուսաստանը, Չինաստանը, Մեծ Բրիտանիան, Ֆրանսիան, Հնդկաստանը, Պակիստանը, Հյուսիսային Կորեան և Իսրայելը, դրան մասնակից չեն։

Գերմանիան չունի սեփական միջուկային զենք, սակայն նրա տարածքում տեղակայված են ամերիկյան միջուկային մարտագլխիկներ։

«Քանի դեռ Գերմանիային և նրա դաշնակիցներին սպառնում է միջուկային զենքի կիրառումը, ՆԱՏՕ-ի շրջանակում վստահելի միջուկային զսպման անհրաժեշտությունը պահպանվում է»,- ընդգծվում է կառավարության պատասխանում։

Տաթև Ֆռանգյան