Այսպիսի սկանդալում հայտնված Գագիկ Ջհանգիրյանը, Ռուբեն Վարդազարյանը չպիտի՛ առնչվեն արդարադատության հետ․ Զարուհի Հովհաննիսյան. ՏԵՍԱՆՅՈւԹ

Աղմուկ է բարձրացրել ԲԴԽ-ի՝ կասեցված լիազորություններով նախագահ Ռուբեն Վարդազարյանի գաղտնի ձայնագրությունը, որը լի է հայհոյանքներով, և որտեղ ԲԴԽ նախագահի պարտականությունները կատարող Գագիկ Ջհանգիրյանը, ըստ Վարդազարյանի, 2021-ի փետրվարի 20-ին համոզել է իրեն հրաժարական տալ, ինչի դեպքում ինքը կազատվեր քրեական պատասխանատվությունից։

Հիշեցնենք, Վարդազարյանի լիազորությունների կասեցման պատճառը արդարադատությանը խոչընդոտելու հոդվածով նրա դեմ հարուցված քրեական գործն էր։

Իրավապաշտպան Զարուհի Հովհաննիսյանը Factor TV-ի հետ հարցազրույցում տեսակետ է հայտնում, որ այս պատմությունը համակարգի՝ դեմքը չփոխելու մասին է վկայում։

«Այդ մասին իրավապաշտպաններն արդեն երեք տարի խոսում են։ Միգուցե, 2018-ին դեռ սպասողական վիճակ էր, թե ինչպես կպահի նոր կառավարությունը, նոր ձևավորված ԱԺ-ն, բայց ցավոք սրտի, մենք տեսնում ենք, որ գործիքակազմը և մեթոդները դեռևս նույնն են։ Մարդիկ, որոնք նշանակվում են, տեսնում ենք, նախկինում մաքուր անցյալ չեն ունեցել։

Ջհանգիրյանի՝ զինդատազ լինելու տարիներին կային բազմաթիվ քրեական գործեր, որոնք կասկածի տակ էին, և դատարանում պարզվեց, որ դրանք շինծու գործեր էին։ Նրա նշանակումը անակնկալ չէր, որովհետև պարզ էր, որ համակարգը դեմքը չի փոխում, բայց ինձ համար ցավալի և տրավմատիկ էր Մատաղիսի գործը։ Հիշեմ վերջում Ջհանգիրյանի արտահայտած կարծիքը, որ ինքը մնում է իր պատկերացմանը, որ տղաները մեղավոր են»,- ասում է Զարուհի Հովհաննիսյանը։

Պե՞տք է արդյոք պաշտոնից հեռանա ո՛չ միայն Ռուբեն Վարդազարյանը, այլև Գագիկ Ջհանգիրյանը։ Ըստ իրավապաշտպանի՝ այսպիսի «սկանդալի կենտրոնում հայտնված ցանկացած անձ պետք է առնչություն չունենա դատական համակարգի հետ»։

«Միայն արդար դատարանները կարող են վերականգնել խախտված իրավունքները։ Եթե մենք չունենք այդ համակարգը, ուրեմն՝ իրավունքները կխախտվեն, չենք ունենա մարդու իրավունքների հստակ պաշտպանություն, չենք ունենա նաև ժողովրդավարություն»,- նշեց իրավապաշտպանը։

Հարցազրույցն ամբողջությամբ՝ տեսանյութում։

Ռոբերտ Անանյան