Ռուսաստանն ավելացնում է ռազմական ներկայությունը Լատինական Ամերիկայում

Նիկարագուան նախագահ Դանիել Օրտեգան հրամանագիր է ստորագրել, որով թույլատրել է ավելացնել ռուսական զորքերի ներկայությունը երկրում, գրում է DW-ի ռուսական ծառայությունը։

Նշենք, որ Նիկարագուան Ռուսաստանի ամենամոտ դաշնակիցներից մեկն է Լատինական Ամերիկայում

Ռուսական զորքերը, նավերն ու ինքնաթիռները Նիկարագուայում կտեղակայվեն տարվա երկրորդ կեսին։ Ըստ ռուսական ԶԼՄ-ների՝ դա արվում է «բացառապես մարդասիրական նպատակներով»։

Աղբյուրի փոխանցմամբ՝ այս լուրը տհաճ ցնցում էր հարավային հարևանի՝ Կոստա Ռիկայի համար, որը 1948 թվականից ի վեր սեփական զինված ուժերը չունի։

«Իհարկե, Կոստա Ռիկան, որպես խաղաղ երկիր, որը կայացրել է բանակ չունենալու պատմական որոշում, մտահոգված է, երբ սահմանի մյուս կողմում գտնվող հարևանը սկսում է ռազմական ուժեր հավաքել»,- ասել է Կոստա Ռիկայի նախագահ Ռոդրիգո Չավեսը՝ պատասխանելով Նիկարագուայի իշխանությունների գործողությունների վերաբերյալ հարցին։

ԱՄՆ-ում լուրն աննկատ չի մնացել։ Հունիսի 9-ին ելույթ ունենալով DW հեռուստաալիքով՝ ԱՄՆ պետքարտուղարի՝ Արևմտյան կիսագնդի հարցերով օգնական Բրայան Նիկոլսը խստորեն դատապարտել է Մանագուայի որոշումը։

«Նիկարագուան ռուսական ուժերին հրավիրել է մանևրելու, մինչ Ռուսաստանը ներխուժում է հարևան երկիր և խախտում Ուկրաինայում մարդու իրավունքները: Մենք դա համարում ենք Նիկարագուայի ռեժիմի սադրանք»,- ասել է նա։

Նիկոլսը նաև ակնարկել է Վաշինգտոնի հնարավոր պատասխանի մասին:

«Մենք պահանջում էինք ազատ արձակել քաղբանտարկյալներին և պահպանել ժողովրդավարական նորմերը, ինչպես նաև հրաժարվել հարևանների դեմ սադրանքներից: Բայց դա չլսվեց: Ակնհայտ է, որ մենք պետք է օգտագործենք մեր ձեռքի տակ եղած լծակները և գործիքները՝ մեր անհամաձայնությունն արտահայտելու համար»,- ասել է ամերիկացի դիվանագետը Լոս Անջելեսում Ամերիկայի գագաթնաժողովի շրջանակում։

Տաթև Ֆռանգյան