Քաղաքականություն
21.06.2022 | 17:50
Թուրքիայի կառավարությունը կարող է հետաքրքված լինել բրիտանական Eurofighter Typhoon ռազմական ինքնաթիռների գնմամբ, եթե ԱՄՆ-ից F-16 գնելու դիմումն առաջընթաց չունենա։ Այս մասին Middle East Eye-ին հայտնել են իրավիճակին ծանոթ աղբյուրները։
Լրատվամիջոցը նշում է, որ թուրքական ռազմաօդային ուժերի հրամանատար, գեներալ Հասան Քուջուքակյուզը անցյալ ամիս այցելել է Միացյալ Թագավորություն՝ Eurofighter կոնսորցիումի գլխավոր արտադրողը, և հանդիպել թագավորական օդուժի հրամանատար մարշալ Մայք Ուինգսթոնին։
«Eurofighter Typhoon-ները շատ լավն են, գերազանց որակի։ Դրանք կարող են ժամանակավոր տարբերակ լինել, քանի դեռ ձեռք չենք բերել հինգերորդ սերնդի TF-X-ի և տեղական արտադրությունը, իհարկե, եթե մենք չկարողանանք ձեռք բերել F-16-ը»,- լրատվականին ասել է թուրքական կառավարության աղբյուրը։
Սեպտեմբերին Թուրքիան 40 միավոր F-16-երի և 80 արդիականացման սարքերի գնման խնդրանքով նամակ է ուղարկել ԱՄՆ կառավարությանը՝ ավելի քան երկու տարի առաջ F-35-ի ծրագրից դուրս գալուց հետո՝ ռուսական S-400 համակարգերի գնման պատճառով: Թուրք պաշտոնյաներն ասում են, որ ԱՄՆ-ն ինքն է իրենց քաջալերել դիմել այդ հարցով։
«Նրանք նույնիսկ գիտեին, թե քանի կործանիչի կարիք ունենք և ասացին՝ ինչո՞ւ չեք դիմում և տեսնում՝ ի՞նչ կլինի»,- MEE-ին ասել է թուրք բարձրաստիճան պաշտոնյան:
Խնդրին ծանոթ աղբյուրներն ասում են, որ F-16-ի հարցումը կարող է Կոնգրես անցնել 2023 թվականի հունիսին Թուրքիայի նախագահական ընտրություններից հետո, քանի որ Բայդենի վարչակազմը չէր ցանկանում ցույց տալ, թե լավություն է անում Թուրքիայի նախագահ Ռեջեփ Թայիփ Էրդողանի վարչակազմին:
Այնուամենայնիվ, Սիրիայի հյուսիսում քրդական խմբավորումների դեմ ռազմական գործողության մասին Թուրքիայի վերջին սպառնալիքները, ինչպես նաև ՆԱՏՕ-ին Շվեդիայի և Ֆինլանդիայի անդամակցության հարցում Էրդողանի վետոն, կարող են բարդացնել ողջ գործընթացը, և Թուրքիան կարող է երկար ժամանակ չստանալ F-16-ները:
«Մեծ Բրիտանիան երկար ժամանակ փորձում է «Typhoon» ինքնաթիռը վաճառել Թուրքիային»,- ասել է TurDef.com պաշտպանական կայքի գլխավոր խմբագիր Օզգուր Էքսին:
Էմմա Չոբանյան
