ՆԱՏՕ-ին Շվեդիայի և Ֆինլանդիայի անդամակցության բանակցությունները կշարունակվեն․ Էրդողանի խոսնակ

Ֆինլանդիայի ու Շվեդիայի ՆԱՏՕ-ին անդամակցելու դիմումների շուրջ բանակցությունները շարունակվելու են, և Մադրիդում առաջիկա գագաթնաժողովը այդ առումով վերջնական կետը չէ։ Այս մասին հայտարարել է Թուրքիայի նախագահի մամուլի խոսնակ Իբրահիմ Քալընը Բրյուսելում ՆԱՏՕ-ի կենտրոնակայանում Սկանդինավյան երկու երկրների ներկայացուցիչների հետ խորհրդակցություններից հետո կայացած ճեպազրույցում, գրում է «Անադոլու»-ն։

«Ինչպես մենք հայտարարել  ենք նախկինում, Մադրիդում ՆԱՏՕ-ի գագաթնաժողովը մեզ համար շրջադարձային կամ վերջնական կետ չէ, այդ պատճառվ բանակցությունները կշարունակվեն։ Այդ մասին մենք ասել ենք Շվեդիայի ու Ֆինլանդիայի մեր զրուցակիցներին»,- ասել է Քալընը։

Նա նշել է, որ Թուրքիան ակնկալում է Շվեդիայից կոնկրետ քայլեր PKK-ի դեմ։ Միաժամանակ Քալընը հավելել է, որ Շվեդիայի իշխանություններն այս ուղղությամբ արդեն որոշակի հայտարարություններ հնչեցրել են։

Նա նաև կոչ է արել Շվեդիային ու Ֆիլանդիային  իրենց տարածքում կանխել PKK-ի համար միջոցների հավաքագրումը, նոր անդամների հավաքագրումը, ինչպես նաև Թուրքիայի դեմ նրա գործունեությունն ու քարոզչությունը։

Քալինը նաև հիշեցրել է Անկարայի ակնկալիքները՝ կապված Թուրքիային զենքի մատակարարման ուղղակի կամ անուղղակի էմբարգոյի վերացման հետ։

Հավելենք, որ ՆԱՏՕ-ի գլխավոր քարտողար Յենս Ստոլտենբերգի նախաձեռնությամբ Բրյուսելում դաշինքի կենտրոնակայանում բանակցություններ են անցկացվել Թուրքիայի, Ֆինլանդիայի և Շվեդիայի պատվիրակությունների միջև Հյուսիսատլանտյան դաշինքի բարձրաստիճան ներկայացուցիչների մասնակցությամբ։ Քննարկվել են Շվեդիայի և Ֆինլանդիայի՝ ՆԱՏՕ-ին անդամակցելու դիմումների հարցը և Անկարայի կողմից այդ կապակցությամբ հնչեցված անվտանգության մտահոգությունները։

Թուրքական պատվիրակությունը գլխավորել են նախագահի մամուլի խոսնակ ու գլխավոր խորհրդական Իբրահիմ Քալընը և ԱԳ փոխնախարար Սեդաթ Օնալը։

ՆԱՏՕ-ի առաջնորդների առաջիկա գագաթնաժողովն էլ տեղի է ունենալու Մադրիդում հունիսի 28-30-ը։

Հիշեցնենք, որ Թուրքիան դեմ է Շվեդիայի ու Ֆինլանդիայի ՆԱՏՕ-ին անդամակցությանը։

Էմմա Չոբանյան