Քաղաքականություն
21.06.2022 | 15:22
Ռուսաստանում ԵՄ դեսպան Մարկուս Էդերերը կանչվել է ՌԴ ԱԳՆ՝ կապված Լիտվայի կողմից իր տարածքով բեռների մի մասը Կալինինգրադի մարզ տեղափոխելու արգելքի հետ։ Այս մասին հեռուստատեսային հարցազրույցում հայտարարել է Կալինինգրադի նահանգապետ Անտոն Ալիխանովը, փոխանցում է BBC-ի ռուսական ծառայությունը։
«Որքանով ես գիտեմ՝ երեքշաբթի Ռուսաստանում ԵՄ դեսպան Մարկուս Էդերերին կանչել են ԱԳ նախարարություն, նրան համապատասխան պայմաններ կառաջադրվեն»,- ասել է Ալիխանովը։
Հունիսի 18-ից Վիլնյուսը, համաձայն Ռուսաստանի դեմ սահմանված ԵՄ պատժամիջոցների, արգելել է Լիտվայի տարածքով բեռների տարանցումը Կալինինգրադի մարզ և հակառակ ուղղությամբ։
Արգելքը վերաբերում է մայրցամաքային Ռուսաստանի և Կալինինգրադի միջև փոխադրվող բեռների մինչև 50%-ին, ներառյալ՝ շինանյութը, բետոնը և մետաղները:
Ալիխանովի խոսքով՝ Ռուսաստանը պատասխան միջոցներ կձեռնարկի շրջափակման հետ կապված։
«Եկեք նայենք քարտեզին: Անկեղծ ասած՝ առանց ռուսական տարանցման մերձբալթյան նավահանգիստները պարզապես կվերանան, կարող են լինել հսկայական թվով պատասխան միջոցներ»,- ասել է Կալինինգրադի նահանգապետը։
Վիլնյուսի պաշտոնյաները, վարժ լինելով Ռուսաստանից հնչող սպառնալիքներին, Մոսկվայի նախազգուշացումները հիմնականում որպես բամբասանք են ընդունել, իրավիճակը մեկնաբանել է New York Times-ը:
«Մեզ առանձնապես չեն անհանգստացնում ռուսական սպառնալիքները։ Կրեմլն արձագանքելու շատ քիչ տարբերակներ ունի»,- ասել է Լիտվայի խորհրդարանի Ազգային անվտանգության և պաշտպանության հանձնաժողովի նախագահ Լաուրինաս Կասչյունասը:
Ռուսաստանի ռազմական պատասխանը, նրա կարծիքով, չափազանց քիչ հավանական է, քանի որ Լիտվան ՆԱՏՕ-ի անդամ է։ Եթե այդպես չլիներ, Մոսկվան, հավանաբար, կդիտարկեր նման հնարավորությունը, կարծում է Կասչյունասը։
Ուկրաինա ռուսական ներխուժման պատճառով ԵՄ-ի սահմանած պատժամիջոցները բացահայտեցին մի տարածաշրջանի սուր խոցելիությունը, որը Ռուսաստանի մաս է, բայց կապված չէ մնացած երկրի հետ, գրում է New York Times-ը։ Այն սահմանակից է Բալթիկ ծովին, բայց գտնվում է ՆԱՏՕ-ի անդամ երկու երկրների՝ Լիտվայի և Լեհաստանի միջև:
Առայժմ ՌԴ ԱԳՆ-ից դեսպանի կանչի պաշտոնական հաստատում չկա։
Տաթև Ֆռանգյան
