22.04.2026 | 21:01
Մարտին Պողոսյանը՝ ծանրամարտի Եվրոպայի առաջնության բրոնզե մեդալակիր
ՀՀ-ն հանցավորության ցածր մակարդակ ունեցող 10 երկրներից շարքում է․ Worldpopulationreview.com
Քաղաքականություն
20.06.2022 | 16:56
Հրապարակվել է աշխարհում 137 երկրում հանցավորության մակարդակի վերաբերյալ 2022 թվականի ինդեքսը։ Worldpopulationreview.com կայքի վերլուծության համաձայն՝ ՀՀ-ն հանցավորության ցածր մակարդակ ունեցող 10 երկրներից շարքում է։
Հանցավորության ընդհանուր մակարդակը հաշվարկվել է՝ բաժանելով ցանկացած տեսակի հանցագործությունների ընդհանուր թիվը երկրների ընդհանուր բնակչության թվին, այնուհետև արդյունքը բազմապատկելով 100․000-ով (քանի որ հանցագործության մակարդակը սովորաբար նշվում է որպես հանցագործությունների X թիվ՝ 100․000 մարդու հաշվով):
Հայաստանը 137 երկրների շարքում հանցավորության ցածր մակարդակով 2,971,966 բնակչությամբ և 22,79 միավորով զբաղեցնում է 10-րդ հորիզոնականը։ Հանցավորության ցածր մակարդակ ունեցող առաջատարների հնգյակում են Կատարը՝ 12.13 միավորով, ԱՄԷ-ն՝ 15.23 միավորով, Թայվանը՝ 15.46, Մեն կղզին՝ 19.25 և Օմանը՝ 20.34 միավորով։
Շվեյցարիայից, Հոնկոնգից, Ճապոնիայից, Սլովենիայից հետո ՀՀ-ն եզրափակում է ցածր հանցավորություն ունեցող երկրների տասնյակը։
Աշխարհում 100․000 մարդու հաշվով հանցավորության տասը ամենաբարձր մակարդակ ունեցող երկրներն են Վենեսուելան (83,76), Պապուա Նոր Գվինեան (80,79), Հարավային Աֆրիկան (76,86), Աֆղանստանը (76,31), Հոնդուրասը (74,54), Տրինիդադ և Տոբագոն (71,63), Գայանան (68,74), Էլ Սալվադորը (67,79), Բրազիլիա (67,49), Ջամայկան (67,42)։
Տաթև Ֆռանգյան
