17.01.2026 | 14:10
Նոր համայնքային փնջեր են ձևավորվելու․ ՏԿԵՆ-ը նախագիծ է ներկայացրել
G7-ի երկրները պայմանավորվել են համագործակցել՝ մամուլի ազատության պաշտպանության համար
Քաղաքականություն
20.06.2022 | 16:14
«Մեծ յոթնյակի» (G7) երկրները ցանկանում են ավելին անել՝ մամուլի և արտահայտվելու ազատությունն ապահովելու և ապատեղեկատվության դեմ պայքարելու համար։ Բոննում տեղի ունեցած հանդիպման ժամանակ G7-ի երկրների մշակույթի նախարարները համապատասխան կոմյունիկե են հրապարակել, փոխանցվում է DW-ի ռուսական ծառայությունը։
Փաստաթղթի համաձայն՝ նախատեսվում է գտնել կեղծ տեղեկատվության արդյունավետ հակազդման միասնական միջոց։ G7-ը ցանկանում է նաև հանդես գալ կառավարության գրաքննության և ազատ մամուլի սահմանափակումների դեմ: Բացի այդ, կքննարկվեն շուկայի կանոնները, որոնք ուղղված են տեղեկատվական խոշոր հարթակներին:
Գերմանիայի մշակույթի և ԶԼՄ-ների պետական նախարար Կլաուդիա Ռոթը հայտարարել է, որ կոմյունիկեն նաև «ազդանշան է ազատ լրատվամիջոցների կարգը պաշտպանելու համար»: Նրա խոսքով, ապատեղեկատվությունը դարձել է զենք, այդ թվում՝ Ուկրաինայի դեմ Ռուսաստանի պատերազմի ազդեցության ներքո։ Ռոթը մատնանշել է G7-ի երկրների ցանկությունը՝ ավելի ակտիվորեն ներգրավվել սպառնալիքի տակ գտնվող լրագրողների պաշտպանությանն ուղղված աշխատանքում։
Մշակույթի նախարարների հանդիպումը կայացել է G7-ի գագաթնաժողովից մոտ մեկ շաբաթ առաջ, որը կանցկացվի Բավարիայի Էլմաու ամրոցում՝ Գերմանիայի կանցլեր Օլաֆ Շոլցի գլխավորությամբ։ Մասնակիցների խոսքով՝ սա առաջին դեպքն է, երբ նման հանդիպման ժամանակ մեդիա քաղաքականությունը դիտարկվում է որպես անկախ թեմա։
Տաթև Ֆռանգյան
