09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Մոլդովայում արգելել են ռուսական լրատվական հաղորդումները
Քաղաքականություն
19.06.2022 | 11:43
Մոլդովայի նախագահ Մայա Սանդուն օրենք է ստորագրել, որն արգելում է ռուսական լրատվական հաղորդումները, «ՌԻԱ Նովոստի»-ի փոխանցմամբ՝ ասել է Հեռուստատեսության և ռադիոյի խորհրդի ղեկավար Լիլիանա Վիցուն Rlive ինտերնետային ալիքի Rezoomat առցանց նախագծի եթերում։
Նա նշել է, որ հաջորդ ուրբաթ՝ հունիսի 24-ին, օրենքը կհրապարակվի պաշտոնական տեղեկագրում, որից հետո այն ուժի մեջ կմտնի:
«Սահմանվում է ապատեղեկատվություն հասկացությունը, ինչը ենթադրում է շատ ավելի կոշտ պատժամիջոցներ։ Եթե փաստն ապացուցվի, ապա ընկերությունները կզրկվեն 7 տարվա լիցենզիայից։ Ապատեղեկատվության առատություն մենք տեսնում ենք, որպես կանոն, նախընտրական շրջանում»,- ասել է Վիցան։
Նրա խոսքով՝ Ուկրաինայում ստեղծված իրավիճակը ստիպում է Քիշնևին կոշտ միջոցներ ձեռնարկել։
Հունիսի 2-ին Մոլդովայի խորհրդարանն օրենք է ընդունել տեղեկատվական տարածության պաշտպանության մասին, որն արգելում է Ռուսաստանից լրատվական ու վերլուծական հաղորդումների ու ռազմական ֆիլմերի վերահեռարձակումը։
«Արտաքին քարոզչության» դեմ ուղղված նմանատիպ արգելք արդեն ընդունվել էր 2017 թվականին, սակայն 2020 թվականի դեկտեմբերին այն չեղարկվել էր Սոցիալիստական կուսակցության նախաձեռնությամբ։
