03.03.2026 | 23:33
«Դա ձեզ համար Ուինսթոն Չերչիլը չէ». Թրամփը հայտարարել է, որ հատկապես դժգոհ է Մեծ Բրիտանիայի արձագանքից
Մինչ եվրոպացի առաջնորդներն այցելում են Կիև, Պուտինը կտրում է նրանց գազամատակարարումը․ NYT-ի անդրադարձը
Քաղաքականություն
17.06.2022 | 20:53
Հինգշաբթի, երբ Եվրոպայի երեք խոշորագույն տնտեսություններով երկրների ղեկավարները հայտնվեցին Կիևում՝ Ուկրաինային աջակցության ուղերձ հղելու, Ռուսաստանի նախագահ Վլադիմիր Պուտինն իր ուղերձն է հղել նրանց՝ «Մի՛ մոռացեք, որ ձեր արդյունաբերությունն իմ ողորմածության տակ է», գրում է New York Times-ը:
Մինչ գնաճն արդեն մոտ էր 40 տարվա առավելագույնին, գազի գներն է՛լ ավելի բարձրացան, քանի որ Ռուսաստանը հինգշաբթի երկրորդ օրն անընդմեջ կրճատեց հոսքերը դեպի Եվրոպայի բնական գազի կարևորագույն գազատար: Գերմանիան, Իտալիան, Ավստրիան և Չեխիան արձանագրեցին բնական գազի մատակարարումների քանակի նվազում։
«Գազպրոմը»՝ Ռուսաստանի իշխանության հսկողության տակ գտնվող գազային հսկան, հայտարարել է, որ մեղավորը վերանորոգման համար սարքավորումների մատակարարումների հապաղումն է: Բայց եվրոպացի պաշտոնյաները բացահայտորեն մեղադրեցին Պուտինին էներգիայի մատակարարումները որպես զենք օգտագործելու մեջ՝ թաղելով այն գաղափարի վերջին մասնիկը, որ գոնե էներգետիկայի հարցում Մոսկվան հուսալի գործընկեր է:
NYT-ը գրում է, որ գազի արտահանումը Մոսկվային տվել է հզոր դիվանագիտական գործիք մայրցամաքում, որտեղ արդյունաբերության մեծ հատվածները կախված են ռուսական էներգիայից: Մինչ Գերմանիայի կանցլեր Օլաֆ Շոլցը, Ֆրանսիայի նախագահ Էմանուել Մակրոնը և Իտալիայի վարչապետ Մարիո Դրագին Կիևում հանդիպում էին նախագահ Վլադիմիր Զելենսկիի հետ, Պուտինը նրանց հիշեցրեց, որ մատը դրել է գազի կոճակին, և իր ձեռքում է եվրոպական տնտեսությունների ճակատագիրը։
Պատերազմի սկզբից ի վեր սա առաջին դեպքը չէ, երբ Պուտինը ռազմավարական նպատակով կրճատում է Եվրոպայի գազի մատակարարումները: Անցյալ ամիս Ռուսաստանը դադարեցրեց էլեկտրաէներգիայի արտահանումը և գազի մատակարարումը Ֆինլանդիա այն բանից հետո, երբ երկիրը հրաժարվեց իր երկարամյա չեզոքությունից և պաշտոնապես դիմեց ՆԱՏՕ-ին անդամակցելու խնդրանքով:
Բացի այդ, ապրիլին Մոսկվան դադարեցրեց բնական գազի մատակարարումները Լեհաստան և Բուլղարիա՝ ՆԱՏՕ-ի երկու անդամ երկրներ, որոնք պատերազմի հարցում Ռուսաստանի դեմ առանձնակի ընդգծված դիրքորոշում ունեն:
Տաթև Ֆռանգյան
