Քաղաքականություն
17.06.2022 | 12:09Հայկական կողմը բոլոր բանակցությունների ժամանակ շեշտում է, որ Լեռնային Ղարաբաղի խնդիրը կա՝ ի հակառակ ադրբեջանական կողմի պնդումների, թե ԼՂ խնդիր այլևս չկա: Ռուսաստանի հայ համայնքի հետ հանդիպմանն այս մասին նշեց ՀՀ նախագահ Վահագն Խաչատուրյանը:
«Մենք բոլոր բանակցությունների, համատեղ հայտարարությունների ժամանակ միշտ շեշտում ենք, որ կա Լեռնային Ղարաբաղի խնդիր, և դա պետք է արձանագրվի ցանկացած հանդիպման ժամանակ»,- ասաց նախագահը:
Նրա խոսքով՝ ԼՂ հակամարտության կարգավորման շուրջ քննարկումները պետք է շարունակվեն Մինսկի խմբի համանախագահության հարթակում: Նախագահի խոսքով՝ շատ կարևոր է, որ Մինսկի խմբի համանախագահությունն էլ գտնում է, որ ԼՂ խնդիրը լուծված չէ:
«Այստեղ մի կարևոր հարց կա. թվում է՝ այսօրվա պայմաններում այդ հանդիպումը հնարավոր չէ կազմակերպել, որովհետև Ռուսաստանն, ԱՄՆ-ը ու Ֆրանսիան մի սեղանի շուրջ չեն կարող նստել, բայց պայմանավորվածությունն այնպիսին է, որ պետք է շարունակենք»,- նշեց Խաչատուրյանը՝ հավելելով, որ նման տրամադրվածություն կա նաև ՌԴ-ի կողմից և ԼՂ հարցի քննարկումը կարող է մի հարթակ լինել, որտեղ ինչ-որ պահի Ռուսաստանը, ԱՄՆ-ը և Ֆրանսիան կնստեն մի սեղանի շուրջ:
Մանրամասները՝ տեսանյութում:
