Գյուղեր կան, ուր ասֆալտը դիմանում է մինչև հաջորդ անձրևը. Փաշինյան․ ՏԵՍԱՆՅՈՒԹ

Մեկնարկել է ՀՀ կառավարության հերթական նիստը։ Նիստի օրակարգում ընդգրկված է 43 հարց, որից 39-ը չի զեկուցվում: Եվս մեկ հարց գաղտնի է:

Կառավարությունը համաֆինանսավորմամբ պետական բյուջեից 268.5 միլիոն դրամ կտրամադրի մարզպետարանների սուբվենցիոն ծրագրերի համար:

Կառավարության այսօրվա նիստում տարածքային կառավարման և ենթակառուցվածքների նախարար Գնել Սանոսյանը նշեց, որ գումարը հատկացվելու է  18 բնակավայրերի 20 սուբվենցիոն ծրագրերի համար: Նրա խոսքով՝ 2022 թվականի հունվարից սկսած մենք արդեն 229 ծրագրի համար 5.6 միլիարդ դրամ  տրամադրվել էր և ևս 20 ծրագրի համար այսօր է տրամադրում: Ընդհանուր այս տարի հունիսի 17-ի դրությամբ 249 ծրագիր  ավարտում է և 5.9 միլիարդ դրամ հատկացվում է այս աշխատանքների համար:

Վարչապետ Նիկոլ Փաշինյանն ընդգծեց, որ ծավալուն աշխատանքներ են իրականացվել և թվարկեց կատարված աշխատանքները։

Անդրադառնալով սալարկման աշխատանքներին՝ վարչապետն ընդգծեց. «Ես համոզվել եմ, որ մեր գյուղերը ցեխից ազատելու միակ ճանապարհը գյուղական փողոցների սալարկման ծրագիրն է»:

«Արարատի մարզում, օրինակ, հարթ ռելիեֆով գյուղեր կան, և այդտեղ ասֆալտապատելը հնարավոր է, իսկ բարդ ռելիեֆով գյուղերում ասֆալտ անելը նշանակում է ասֆալտ անել մինչև հաջորդ ուժեղ անձրևը: Կարծում եմ՝ կառավարության մասնակցության չափաբաժինը այսպիսի սուբվենցիոն ծրագրերում պետք է մեծացնել»,- նշեց վարչապետը՝ հավելելով, որ սալարկման դեպքում պահպանվում է գյուղական կոլորիտը:

Մանրամասները՝ տեսանյութում: