20.11.2024 | 08:36
Նիկոլ Փաշինյանը հայտնեց ՆԳ նոր նախարարի անունը
Թուրքիան լիակատար սնանկացման եզրին է․ զգուշացնում է Էրդողանի նախկին համախոհ Ալի Բաբաջանը
16.06.2022 | 23:30
Թուրքիայի ընդդիմադիր «Ժողովրդավարություն և առաջընթաց» (DEVA) կուսակցության ղեկավար Ալի Բաբաջանը հայտարարել է, որ երկիրը գտնվում է լիակատար սնանկացման եզրին, գրում են թուրքական լրատվամիջոցները։
Անկարայում կուսակցության կենտրոնակայանում հանդիպման ժամանակ Բաբաջանը քննադատել է թուրքական կառավարությանը տնտեսության վատ ղեկավարման համար։
«Այսօր ես ուզում եմ ասել, որ մենք, որպես երկիր, սնանկության եզրին ենք, և կոչ եմ անում կառավարությանը՝ անհապաղ կատարել իր պարտականությունները։ Ես անհանգստացած եմ, քանի որ մեր երկրի դեֆոլտի ռիսկը, այն է՝ սնանկության ռիսկը, հասել է աննախադեպ մակարդակի։ Մեր երեխաների ապագան վտանգված է։ Մենք կանգնած ենք տնտեսական և ֆինանսական գոյատևման խնդրի առաջ։ Թուրքիայի վարկանիշն իջել է պատմության մեջ ամենավատ մակարդակին»,- ասել է ընդդիմադիր գործիչը։
Նա նշել է, որ դեֆոլտն ու սնանկությունը նշանակում են, որ Թուրքիան չի կարողանա վճարել իր ներկրած բնական գազի և նավթի համար, սնանկությունը նշանակում է, որ տարրական կարիքները, ինչպիսիք են գազը, դիզվառելիքը, նույնիսկ փողով հնարավոր չի լինի ապահովել։
«Սնանկությունը նշանակում է էլեկտրաէներգիայի համատարած և երկարատև անջատումներ ամբողջ երկրում: Պատկերացրեք, որ էլեկտրաէներգիան անջատված է օրական 6 ժամ, 10 ժամ: Դա է վտանգը: Նրանք չգիտեն։ Սնանկությունը նշանակում է ամբողջական տնտեսական և ֆինանսական կոլապս։ Սնանկություն նշանակում է քաոս»,- ասել է Բաբաջանը։
Նա կոչ է արել Թուրքիայի նախագահ Ռեջեփ Թայիփ Էրդողանին՝ փոխել երկրի տնտեսական ու ֆինանսական կառավարումը։
«Արեք այն, ինչ անհրաժեշտ է՝ ողջամտության և գիտության վրա հիմնված տնտեսության և ֆինանսների կառավարման համար։ Անհապաղ նշանակեք որակյալ կադրեր Կենտրոնական բանկում և Թուրքիայի վիճակագրական ինստիտուտում և մի միջամտեք այս անկախ հաստատությունների գործունեությանը»,- ասել է Բաբաջանը։
Նշենք, որ Ալի Բաբաջանը նախկինում եղել է Թուրքիայի փոխվարչապետը, էկոնոմիկայի, ինչպես նաև ԱԳ նախարարը։ Նա իշխող «Արդարություն և զարգացում» կուսակցության համահիմնադիրներից էր և նրա առաջնորդ ու երկրի նախագահ Ռեջեփ Թայիփ Էրդողանի մտերիմներից։ Սակայն Էրդողանի քաղաքականության հետ ունեցած տարաձայնությունների պատճառով Բաբաջանը 2019 թվականին դուրս եկավ իշխող ուժից և 2020-ին հիմնեց իր կուսակցությունը։
Էմմա Չոբանյան
