19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Վրաստանում կապիկի ծաղիկով վարակվածը երիտասարդ տղամարդ է. համաճարակաբան. ՏԵՍԱՆՅՈՒԹ
16.06.2022 | 14:29
Վրաստանում հաստատվել է կապիկի ծաղիկով վարակվելու առաջին դեպքը։
«Երեկվա դրությամբ աշխարհում՝ 34 երկրում, արձանագրվել է 1704 դեպք՝ հիմնականում երիտասարդ տղամարդկանց շրջանում: Վրաստանում կապիկի ծաղիկով վարակվածը ևս երիտասարդ տղամարդ է»,- այսօր հրավիրված ասուլիսում այս մասին նշեց ՀՀ առողջապահության նախարարութան Հիվանդությունների վերահսկման և կանխարգելման ազգային կենտրոնի մարդու և կենդանիների ընդհանուր և մակաբուծային հիվանդությունների համաճարակաբանության բաժնի պետ Լուսինե Պարոնյանը:
Նրա խոսքով՝ սահմանի անցման կետերում հայաստանյան մասնագետներն իրականացնում են հսկողություն. «Ուժեղացվել է վերահսկողությունը ջերմող հիվանդների համար, քանի որ կապիկի ծաղիկը սկսվում է ջերմությամբ, 2-3 օրվա ընթացքում ցան է առաջանում:
Համաճարակաբանի հավաստմամբ՝ Հայաստանում կապիկի ծաղիկի կանխարգելման ընթացիկ միջոցառումներ են իրականացվում: «Ուսուցում է իրականացվում, նաև աշխատում ենք բժշկական կազմակերպությունների հետ՝ զգոնությունը բարձրացնելու և կասկածելի դեպքերը վաղ հայտնաբերելու ուղղությամբ: Կասկածելի դեպքի ախտանշան է համարվում 38 աստիճան և ավելի ջերմությունը, որին 2-3 օր հետո միանում է ցանը և ավշային հանգույցների բորբոքումը»,- նշեց Պարոնյանը:
Նշենք, որ «կապիկի ծաղիկը» վիրուսային հիվանդություն է: Այդպես է կոչվում, քանի որ առաջին անգամ հայտնաբերվել է կապիկների մոտ՝ 1958-ին:
Կապիկի ծաղիկը վիրուսների նույն ընտանիքում է, ինչ պատվաստումներով հաղթահարված խիստ մահացու բնական ծաղիկ հիվանդությանը, բայց ի տարբերություն ծաղիկ հիվանդության՝ կապիկի ծաղիկն ավելի մեղմ ընթացք ունի:
Հիվանդությունը հիմնականում փոխանցվում է սերտ շփման միջոցով, օդակաթիլային ճանապարհով և աղտոտված առարկաների միջոցով:
Մանրամասները՝ տեսանյութում:
