Ուկրաինայում գտնվող երկու ամերիկացիներ կարող են լինել ռուսական գերության մեջ․ ԶԼՄ-ներ

Ուկրաինայում պատերազմին մասնակցող երկու ամերիկացիներ անհետ կորել են և կարող են լինել ռուսական գերության մեջ։ Այս մասին CNN-ին հայտնել են զինվորների հարազատները, փոխանցում է BBC-ի ռուսական ծառայությունը։

Ալեքսանդր Դրուքը և Էնդի Հյուինը՝ Ալաբամայից ԱՄՆ ԶՈՒ-ի նախկին զինվորականներ, դադարել են ընտանիքի անդամների հետ կապի դուրս գալ։ Դրուքի մայրը դիմել է կոնգրեսական Թերրի Սյուելին ու հայտնել, որ որդուց մի քանի օր է՝ լուր չունի։ Բաննի Դրուքը պատմել է, որ իր որդին ուկրաինացի զինվորականներին սովորել է՝ ինչպես օգտագործել ամերիկյան արտադրության զենքերը։

«Ալեքսը ցանկանում էր օգնել ուկրաինացիներին ուժեղանալ և պայքարել Պուտինի դեմ»,- ասել է նա Washington Post-ին:

Հյուինի հարսնացու Ջոյ Բլեքն էլ հայտարարել է, որ չունի հաստատում, որ իր փեսացուն ռուսական գերության մեջ է, բայց չի բացառում դրա հնարավորությունը։ Երկու կանայք էլ պատմել են, որ վերջին անգամ իրենց հարազատների հետ խոսել են հունիսի 8-ին, երբ տղամարդիկ իրենց պատմել են, որ գնում են առաջադրանք կատարելու։

Եթե ​​նրանց հարազատների մտավախությունները հաստատվեն, ապա Դրուքը և Հյուինը կդառնան առաջին ամերիկացիները, որոնք գերի են ընկել Ուկրաինայում։

Պետքարտուղարության ներկայացուցիչն էլ ասել է, որ ԱՄՆ իշխանությունները տեղյակ են Ուկրաինայում գերեվարված ԱՄՆ երկու քաղաքացիների մասին չհաստատված տեղեկություններից և կապի մեջ են Կիևի իշխանությունների հետ։

Սպիտակ տան Ազգային անվտանգության խորհրդի ռազմավարական հաղորդակցության համակարգող Ջոն Քիրբին էլ ասել է, որ եթե դա ճիշտ լինի, ամեն ինչ կանեն՝ նրանց տուն վերադարձնելու համար։ Նա նաև հիշեցրել է, որ ԱՄՆ-ը խորհուրդ չի տալիս ամերիկացիներին գնալ Ուկրաինայում կռվելու։

Էմմա Չոբանյան