08.06.2026 | 06:48
1299 ընտրատեղամասերում քվեարկության նախնական արդյունքները․ ԿԸՀ
Իտալիան նախազգուշացրել է սարսափելի հետևանքների մասին, եթե ՌԴ-ն չականազերծի նավահանգիստները հացահատիկի մատակարարման համար
08.06.2022 | 23:10
Հացահատիկի արտահանման արգելափակումը նշանակում է պատանդ պահել և մահվան դատապարտել միլիոնավոր երեխաների, կանանց և տղամարդկանց։ Այս մասին հայտարարել է Իտալիայի արտգործնախարար Լուիջի Դի Մայոն, գրում է BBC-ի ռուսական ծառայությունը։
Նրա խոսքով՝ առաջիկա շաբաթները վճռորոշ նշանակություն են ունենալու պարենային ճգնաժամի համար։
Ուկրաինան աշխարհում հացահատիկի հիմնական մատակարարներից մեկն է։ Այն բանից հետո, երբ Ռուսաստանը գրավեց ուկրաինական մի քանի նավահանգիստներ, հացահատիկի մատակարարումները դադարեցվեցին։ Ռուսաստանը հերքում է, որ Ուկրաինա ներխուժումը նպաստել է պարենային ճգնաժամին, և պնդում, թե Ուկրաինան ականապատել է իր նավահանգիստները, ինչը խաթարել է մատակարարումները։
Այսօր Անկարայում ՌԴ ԱԳ նախարար Սերգեյ Լավրովն ու Թուրքիայի ԱԳ նախարար Մևլութ Չավուշօղլուն քննարկել են նավահանգիստների համատեղ ականազերծման հնարավորությունը։
Ուկրաինայի ԱԳ նախարար Դմիտրի Կուլեբան էլ, մեկնաբանելով այդ բանակցությունները, հայտարարել է, որ իր երկիրը հարցը փորձում է լուծել ՄԱԿ-ի միջոցով։ Նա նշել է, որ նավահանգիստների աշխատանքի վերսկսման վերաբերյալ ցանկացած պայմանավորվածություն չպետք է խանգարի Ուկրաինայի անվտանգությանը։
Էմմա Չոբանյան
