ՀՀ-ում ռուսական նոր ռազմաբազա՞ է կառուցվում․ ՊՆ-ն առայժմ չի մեկնաբանում, քաղաքագետը վտանգներ է տեսնում. ՏԵՍԱՆՅՈՒԹ

Արդեն մոտ 1 ամիս է, ինչ Տավուշի մարզի Բերդ բնակավայրի մոտ շինարարություն է ընթանում։ Տեղի բնակիչների խոսքով՝ ռուսական ռազմական հենակետ է կառուցվում։

Տիկին Արփիկը, ում տան պատը նախորդ տարի ադրբեջանցիների կրակոցի հետևանքով վնասվել էր, ասում է՝ արդեն մի քանի ամիս է՝ կրակոցի ձայներ չեն լսում։ Չեն պատկերացնում՝ ինչի՞ համար է ռուսական զորքի ներկայության անհրաժեշտություն առաջացել։ Թեպետ նշում են՝ հակառակորդի լռությունն էլ մտահոգիչ է։

Factor TV-ի նկարահանման պահին տարածքում աշխատողներ չկային, շինարարություն չէր ընթանում, բայց որոշ աշխատանքներ արդեն արված էին․ տարածքը հարթեցված էր, շինանյութը՝ բերված։ Տարածքը հսկող միայն մի կնոջ հանդիպեցինք։

Տիկին Վեներան էլ շատ բան չգիտեր, տարածքն էր միայն հսկում։ Ասաց միայն, որ ռուսների համար է կառուցվում, նաև տներ են կառուցելու ռուս զինվորականների համար։ Մինչ այս պահը որևէ տեղեկություն այն մասին, թե ի՞նչ է կառուցվում ու ի՞նչ նպատակով, պատկան որևէ մարմին պաշտոնապես չի հայտնել։

Տպավորություն է, որ այս փաստը թաքցնելու դիտավորություն կա, հենց սա է մտահոգիչ՝ ասում է քաղաքագետ Սարո Սարոյանը։ Հարց է առաջանում՝ Բերդի տարածաշրջանում ռուս սահմանապահների օգնությամբ ի՞նչ հարց է փորձում լուծել պաշտպանական գերատեսչությունը։

Քաղաքական խնդիրները, ըստ Սարո Սարոյանի, կարող են կապված լինել հայ-ադրբեջանական սահմանային խնդիրների հետ։ Հաշվի առնելով վերջին 2 տարում տեղի ունեցած տարածքային փոխոփություններն ու ադրբեջանական զինուժի մուտքը հայկական տարածքներ՝ կարող ենք միայն ենթադրել, թե ռուսական զորքի միջոցով ինչ խնդիրներ են լուծվելու։

Ի՞նչ է կառուցվում, ո՞ր իրավական ակտի կամ փաստաթղթի շրջանակում, ի՞նչ նպատակի է ծառայելու և ինչո՞վ է պայմանավորված ռուսական զորք տեղակայելու անհրաժեշտությունը․ այս հարցերի պատասխանը ստանալու ակնկալիքով Factor TV-ն հարցում ուղարկեց պաշտպանական գերատեսչություն, որտեղից այսպիսի պատասխան ստացավ․ «Հարցման մեջ նշված տեղեկությունները տրամադրելու համար լրացուցիչ ուսումնասիրության անհրաժեշտություն կա: Ըստ այդմ՝ հարցման պատասխանը կտրամադրվի ՀՀ օրենսդրությամբ սահմանված ժամկետներում»:

Օրենսդրությունը սահմանում է 30-օրյա ժամկետ։ Պատասխանը ստանալուց հետո Factor TV-ն կրկին կանդրադառնա խնդրին։

Մանրամասները՝ տեսանյութում։

Սաթենիկ Հայրապետյան