Ճգնաժամը չի վերջացել՝ Փառուխի բնակիչները գյուղ չեն գնացել. ադրբեջանցիները անցնում են ռուսների կողքով․ Վահան Բադասյան․ ՏԵՍԱՆՅՈՒԹ

Factor TV-ի հարցազրույցը Արցախի նախագահի Հատուկ հանձնարարություներով ներկայացուցիչ, «Միացյալ Հայաստան» կուսակցության ղեկավար Վահան Բադասյանի հետ

-Երեկ Արցախի նախագահ Արայիկ Հարությունյանը խորհրդակցություն է հրավիրել իրավապահ մարմինների ղեկավարների մասնակցությամբ և հանձնարարել ձեռնարկել բոլոր միջոցառումները՝ անօրինական շրջանառության մեջ գտնվող զենքի, զինամթերքի, ռազմամթերքի հայտնաբերման ու դրանց առգրավման, ինչպես նաև դրանցից ծագող վտանգը կանխելու ուղղությամբ, ձեռնարկել օպերատիվ-հետախուզական լայնածավալ միջոցառումներ՝ հնարավոր հանցավոր խմբավորումների, հեղինակությունների, արտոնյալների՝ գերիշխող դեր ունենալու փորձերը կանխելու ուղղությամբ: Պարո՛ն Բադասյան, ինչո՞վ էր պայմանավորված այս խորհրդակցությունը, Դուք ի՞նչ վտանգներ եք տեսնում, Արցախում ի՞նչ անհանգստություններ կան ներքին անվտանգության առումով:

-Ցանկացած որոշում, ցանկացած օրենք պետք է բխի երկրի շահերից: Այսօր ավելի, քան երբևէ, մենք ունենք թե՛ այդ որոշման, թե՛ այդպիսի օրենքի կամ օրենսդրական ակտի անհրաժեշտություն: Ունենք խնդիր, քաղաքացիների անվտանգությունն է՛լ ավելի ապահովելու համար, քաղաքացիներից անօրինական զենքերն ինչքան հնարավոր է՝ հավաքելու։ Դա հրատապ խնդիր է, անհրաժեշտություն է, որովհետև պատերազմից հետո լինելու են թվացյալ արտոնյալներ և շատ-շատ կատեգորիաներ, որոնք կամքից կարող են թույլ գտնվել և պետք եղած ժամանակ ձեռքի տակ ունեցած զենքն օգտագործել: Որպեսզի դա տեղի չունենա, անօրինական զենքերը պետք է հավաքել:

-Այսինքն՝ անհրաժեշտություն էր այդ խորհրդակցությունը:

-Այո՛, դրա անհրաժեշտությունը կար:

-Մայիսի 10-ին միջադեպ էր տեղի ունեցել Ստեփանակերտի Վերածննդի հրապարակում. հրաձգություն Արցախի ՊԲ հրամանատարի նախկին տեղակալ Սամվել Կարապետյանի մասնակցությամբ, հանրությանը նա հայտնի է որպես Օգանովսկի։ Նրան մեղադրանք է առաջադրվել խուլիգանության և ապօրինի զենք պահելու հոդվածներով, ձերբակալվել է, ապա ազատ է արձակվել, իհարկե, անմեղության կանխավարկածը հարգելով: Դուք տեղյա՞կ եք՝ ի՞նչ ընթացք ստացավ այս գործը: Նման դեպքերը մտահոգիչ են Արցախի ներքին անվտանգության և կայունության ապահովման համար:

-Իհարկե, մտահոգիչ են: Այս դեպքի առթիվ քրեական գործ է հարուցվել, անմիջապես ձերբակալվել է Սամվել Կարապետյանը, ազատ արձակելուց հետո մարդիկ տարակուսել են, թե ինչո՞ւ են բաց թողել: Ես պարզ բացատրել եմ ինձ հարց տվողներին, որ այն հոդվածների դեպքում, որոնք 3 տարուց ավելի ազատազրկում չեն նախատեսում, դատարանը 72 ժամ հետո որոշում է կայացնում՝ բավարարե՞լ քննիչի պահանջը որպես խափանման միջոց կալանավորումը կիրառելու մասին, թե՞ ոչ: Դատարանն այս դեպքում որոշում է կայացրել չբավարարել քննիչի՝ կալանավորումը որպես խափանման միջոց կիրառելու պահանջը, և նա ազատ է արձակվել՝ չհեռանալու մասին ստորագրությամբ։ Դա նույնպես խափանման միջոց է:

Հարցազրույցն ամբողջությամբ՝ տեսանյութում:

Ռոբերտ Անանյան