Էրդողանը նախագահական ընտրություններում պարտվում է ընդդիմադիր երեք հիմնական թեկնածուներին․ նոր հետազոտություն

Թուրքիայի նախագահ Ռեջեփ Թայիփ Էրդողանը կպարտվեր նախագահի երեք պոտենցիալ իր մրցակից թեկնածուներին երկրի գլխավոր ընդդիմադիր Ժողովրդահանրապետական կուսակցությունից, եթե նախագահական ընտրություններն անցկացվեին մայիսի վերջին։ Այս մասին գրում են թուրքական լրատվամիջոցները՝ վկայակոչելով  Eurasia Public Research Center-ի (AKAM) հետազոտության արդյունքները։

Հարցման արդյունքները, որն անցկացվել է մայիսի 26-ից հունիսի 1-ը հեռախոսային հարցազրույցներով, Twitter-ում հրապարակել է AKAM-ի նախագահ Քեմալ Օզքիրազը։ Արդյունքները ցույց են տալիս, որ իշխող «Արդարություն և զարգացում» կուսակցության (AKP) առաջնորդ Էրդողանը պարտվել է իր պոտենցիալ մրցակիցներից յուրաքանչյուրին՝ CHP-ի առաջնորդ Քեմալ Քըլըչդարօղլուն, Ստամբուլի քաղաքապետ Էքրեմ Իմամօղլուին և Անկարայի քաղաքապետ Մանսուր Յավաշին, երկուսն էլ՝ CHP-ից։

Տվյալների համաձայն, եթե Էրդողանը դիմակայի Քըլըչդարօղլուին, Էրդողանն ու Քըլըչդարօղլուն կհավաքեն, համապատասխանաբար, 39,1 և 51,5 տոկոս՝ չկողմնորոշված ձայները բաժանելով երկուսի միջև։

Ստամբուլի քաղաքապետ Էքրեմ Իմամօղլուի առաջադրվելու սցենարի դեպքում, Էրդողանը կհավաքի 39,2 տոկոս, Իմամօղլուն՝ ձայների 53 տոկոսը։

Անկարայի քաղաքապետ Մանսուր Յավաշը ևս հաղթում է Էրդողանին, քանի որ հարցվածների 38,3 տոկոսն ասել է, որ կքվեարկի Էրդողանի օգտին, իսկ 51,7 տոկոսն ընտրել է Յավաշին։

Երբ մասնակիցներին հարցրել են՝ որ՞ կուսակցության օգտին կքվեարկեք, 30,7 տոկոսն ասել է, որ կքվեարկի հիմնական ընդդիմադիր CHP-ի օգտին, որին հաջորդում են իշխող ԱԶԿ-ն (29,5 տոկոս), «Լավ» կուսակցությունը (13 տոկոս), քրդամետ Ժողովուրդների դեմոկրատական կուսակցությունը (HDP) (9,2 տոկոս), «Ազգայնական շարժում» կուսակցությունը, (5,4 տոկոս), «Ժողովրդավարություն և առաջադիմություն» կուսակցությունը (4,8 տոկոս)։

Հավելենք, որ 2018-ին կայացած վերջին համընդհանուր ընտրություններին ԱԶԿ-ն հավաքել է ձայների 42,6 տոկոսը։ Սակայն հանրային հարցումները ցույց են տալիս, որ կուսակցությանն աջակցությունը նվազում է։

Էմմա Չոբանյան