Թուրքիայում ձերբակալել են Սուրբ Սոֆիային հասցված վնասները լուսաբանող լրագրողին

Թուրքիայում ձերբակալվել է TELE 1 հեռուստաընկերության թղթակիցը՝ Սուրբ Սոֆիայի տաճարի վնասների մասին հաղորդման ժամանակ, գրում են թուրքական լրատվամիջոցները։

Լրագրող Էնգին Աչարը հարցազրույց է վերցրել Արվեստի պատմության ասոցիացիայի ղեկավար Շերիֆ Յաշարից: Նրան թույլ չեն տվել կատարել իր աշխատանքը՝ ոստիկանները Աչարին տարել են Սիրքեջիի ոստիկանական բաժանմունք։ Ցուցմունք տալուց հետո նա ազատ է արձակվել։

Աչարը Twitter-ում հայտնել է իր կալանավորման մասին և ասել, որ ոստիկանները «խելամիտ պատճառ» չեն ներկայացրել ձերբակալման համար։

«Ինձ նույնիսկ խելամիտ պատճառ չասացին, երբ տանում էին ոստիկանություն: Նրանք նշում էին Twitter-ի այն գրառումները, որոնք ես հենց նոր տարածեցի»,- գրել է լրագրողը։

Պատմական հուշարձանը, որը թանգարանից վերածվել է մզկիթի, վերջերս ենթարկվել է զննության՝ այցելուների հասցրած վնասների պատճառով։

Հավելենք, որ վերջին շրջանում մզկիթի վերածված տաճարում պարբերաբար վանդալիզմի դեպքեր են տեղի ունենում։ Վերջերս Օսմանյան կայսրության ժամանակաշրջանի ջրի ամբարն էր կոտրվել, ներսում և կողքին կոշիկներ էին դրվել։ Վանդալիզմի նախորդ դեպքի մասին էլ հայտարարել էր թուրքական արվեստի պատմաբանների ասոցիացիան՝ տեղեկացնելով, որ Սուրբ Սոֆիայի տաճարի ներսում գտնվող 1400-ամյա Կայսերական դարպասը վնասվել է անհայտ անձանց կողմից:

Կայսերական դարպասը գլխավոր մուտքն է դեպի Բյուզանդական կայսրության ժամանակաշրջանի եկեղեցի, որը բացառապես օգտագործվել է կայսեր կողմից։ Ավանդույթի համաձայն՝ դռները պատրաստվել են Նոյյան տապանի կաղնուց։ Վանդալիզմի այս դեպքը դատապարտել էր Հունաստանի ԱԳՆ-ն։

Էմմա Չոբանյան