Բաքուն պատասխանել է ՀՀ ԱԳՆ-ի՝ ադրբեջանական ուժերի կողմից հրադադարի ռեժիմի խախտումը դատապարտող հայտարարությանը

Ադրբեջանի ԱԳՆ-ն արձագանքել է ՀՀ ԱԳՆ-ի հայտարարությանը՝ հերքելով ադրբեջանական կողմից հրադադարի ռեժիմի խախտման մեղադրանքները, գրում են ադրբեջանական լրատվամիջոցները։

Հիշեցնենք՝ ՀՀ ԱԳՆ-ն հայտարարություն էր տարածել մայիսի 28-ին Ադրբեջանի զինված ուժերի կողմից հրադադարի ռեժիմի խախտման վերաբերյալ:

«Խստորեն դատապարտում ենք մայիսի 28-ին ՀՀ սահմանագոտու հարավարևելյան ուղղությամբ Ադրբեջանի զինված ուժերի կողմից հրադադարի ռեժիմի կոպիտ խախտումը, որի հետևանքով զոհվել է ՀՀ ԶՈՒ զինծառայող, շարքային Դավիթ Վահանի Վարդանյանը: Հատկանշական է, որ այս սադրանքին նախորդել էին Ադրբեջանի նախագահի՝ մայիսի 27-ի ապակառուցողական, ռազմատենչ և առավելապաշտական հայտարարությունները, որոնք ներառում էին նաև նկրտումներ ՀՀ ինքնիշխան տարածքի նկատմամբ»,- ասվում է հայտարարության մեջ։

Երևանը նաև կարևորում է, որ ԵԱՀԿ Մինսկի խմբի համանախագահող երկրները, ՀԱՊԿ-ն, Եվրոպական միությունը և ողջ միջազգային հանրությունը պատշաճ և հասցեական գնահատական տան Ադրբեջանի սադրիչ գործողություններին ու հայտարարություններին, ագրեսիվ հռետորաբանությանը, որոնք Հարավային Կովկասում խաղաղության հասնելու ջանքերը խաթարելու նպատակ ունեն։

Ադրբեջանական կողմը, ինչպես միշտ, չի ընդունում հրադադարի ռեժիմի խախտման ու ադրբեջանական ուժերի կողմից հայ զինծառայողի սպանության փաստը։

«Ադրբեջանի ՊՆ-ն հերքել է Ադրբեջանի զինված ուժերի կողմից հրադադարի ռեժիմի ենթադրյալ խախտման մասին «ապատեղեկատվությունն ու զրպարտությունը» և հայտարարել, որ տեղեկատվությունը չի համապատասխանում իրականությանը։ Այն ժամանակ, երբ ջանքեր են ձեռնարկվում երկու երկրների հարաբերությունների կարգավորման համար, հայկական կողմի «զրպարտչական ու ապակառուցողական» հայտարարություններն ուղղված են խաթարելու կարգավորման ջանքերը, ինչպես նաև պետական սահմանի դելիմիտացիայի գործընթացը»,- ասվում է Բաքվի հայտարարությունում։

Ադրբեջանը, որը խախտել է հրադադարն ու սպանել հայ զինծառայողին, Հայաստանին մեղադրում է ապակառուցողական մոտեցման մեջ՝ նշելով, թե այն, իբր, «ակնհայտորեն ուղղված է Երևանի և Բաքվի միջև հարաբերությունների կարգավորման բրյուսելյան հանդիպումների արդյունքները խաթարելուն»։

Էմմա Չոբանյան