22.01.2026 | 15:34
Ուկրաինայում պատերազմը, պարզվեց, «թերևս ամենադժվարն է» ավարտելու համար. Թրամփ
ԱԺ-ն քննարկում է Վերահսկիչ պալատի 2017 թ-ի տարեկան հաշվետվությունը. կա պաշտոնական լիազորությունը չարաշահելու դեպք
Հասարակություն
03.05.2018 | 15:26
Ազգային ժողովում քննարկվում է Վերահսկիչ պալատի 2017 թվականի տարեկան հաշվետվությունը:
Պալատի նախագահ Լևոն Յոլյանը խորհրդարանականներին տեղեկացրեց, որ տարեկան հաշվետվության արդյունքները ամփոփվել են թվով 18 հաշվետվություններում:
Յոլյանի փոխանցմամբ՝ արձանագրված նյութերից երեքում Վերահսկիչ պալատի խորհուրդը ունեցել է քրեաիրավական բնույթի կասկածներ, որոնք ուղարկել է գլխավոր դատախազություն: Դրանք են՝ «Սևան ազգային պարկ» ՊՈԱԿ-ի, ԴԱՀԿ ծառայության և ՀՀ-ում տավարաբուծության զարգացման գյուղնախարարության ծրագրի մասով արձանագրությունները:
«Սևան ազգային պարկ» ՊՈԱԿ-ում իրականացրած ուսումնասիրությունների արդյունքում պաշտոնական լիազորությունները չարաշահելու և պաշտոնական կեղծիքի փաստերի առիթով գլխավոր դատախազությունը քրեական գործ է հարուցել օրերս: Յոլյանը, նախաքննության գաղտնիության սկզբունքներից ելնելով, խուսափեց առավել մանրամասն այդ մասին խոսել՝ նշելով, որ ավելի ուշ կանդրադառնան հարցին:
Հաշվեքննիչ պալատի նախագահը խոսեց նաև ծրագրերի անարդյունավետ կիրառումից՝ որպես օրինակ նշելով գյուղատնտեսական տեխնիկայկի ձեռքբերման հարցը:
«Գաղտնիք չէ, որ գյուղատնտեսության զարգացման նպատակով երկրում կա գյուղտեխնիկայի խիստ կարիք: Այդ նպատակով կառավարությունը 2015-17-ի ընթացքում 8 մարզում ստեղծել է 113 գյուղատնտեսական կոոպերատիվներ, գնել է շուրջ 2 մլրդ 100 մլն դրամի 406 միավոր գյուղտեխնիկա: Ստուգմամբ հայտնաբերվել է, որ գյուղատնտեսության նախարարությունը կոոպերատիվների կարիքներին անհրաժեշտ գյուղտեխնիկայի ուսումնասիրություն չի իրականացրել, կոոպերատիվների գործունեության եւ ստացված գույքի նպատակային շահագործման մոնիտորինգ չի իրականացրել, քիչ չեն դեպքերը, երբ ստացված տրակտորները չեն շահագործվում գյուղգործիքների բացակայության պատճառով կամ հակառակը՝ տրակտորի բացակայության պայմաններում ձեռք են բերվել միայն գյուղգործիքները: Գյուղտեխնիկայի մի մասը չի շահագործվել, իսկ օգտագործվող գյուղտեխնիկայի պարագայում աշխատել է ոչ լիարժեք ծանրաբեռնվածությամբ: Ստացված գործիքների մի մասը չի շահագործվում՝ հողատիպերին չհամապատասխանելու պատճառով և պահվում է բացօթյա ու ոչ պատշաճ պայմաններում»,- ասաց Յոլյանը:
Խորհրդարանն այս պահին շարունակում է հարցի քննարկումը:
