15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Սկանդալ Թուրքիայում․ ընդդիմության առաջնորդը պնդում է, որ Էրդողանն ու նրա ընտանիքը պատրաստվում են ընտրություններից հետո փախչել ԱՄՆ
Քաղաքականություն
25.05.2022 | 17:51
Թուրքիայի գլխավոր ընդդիմադիր Ժողովրդահանրապետական կուսակցության նախագահ Քեմալ Քըլըչդարօղլուն հայտարարել է, որ բացահայտել է նախագահ Ռեջեփ Թայիփ Էրդողանի՝ երկրից փախչելու ծրագիրը ընտրություններում հնարավոր պարտությունից հետո, գրում են թուրքական լրատվամիջոցները։
Թվիթերյան իր էջում նախօրեին հրապարակված տեսանյութում Քըլըչդարօղլուն նշում է, որ իրենք ԱՄՆ գումար փոխանցելու փաստաթղթեր են ձեռք բերել երկու հիմնադրամների՝ Ensar Foundation-ի և Turkey Youth and Education Service Foundation-ի (TÜRGEV) միջոցով։ Ըստ ընդդիմադիր գործչի՝ երկու հիմնադրամները միասին աշխատում են ԱՄՆ-ում գտնվող մեկ այլ հիմնադրամի հետ, և Էրդողանի ընտանիքի անդամները ուղղակիորեն ներգրավված են այդ գործարքներում։
«Մինչ նրանք փախչելու տեղ են փնտրում, մենք այլ հայրենիք չունենք։ Մենք ոչ մի տեղ չենք գնում, այս պետությանը միասին հարություն կտանք»,-ասել է Քըլըչդարօղլուն։ Նա դիմել է նաև պաշտոնյաներին՝ կոչ անելով չկատարել «անօրինական հրամանները»։
«Մեր իշխանության օրոք ազնիվ ու պատվախնդիր պաշտոնյաներին լավ օրեր են սպասվում»,- ասել է գործիչը։
Քըլըչդարօղլուի տեսանյութից հետո մի քանի լրագրողներ էլ հրապարակել են փաստաթղթեր, որոնք ցույց են տալիս, որ երկու հիմնադրամները ամիսների ընթացքում տասնյակ միլիոնավոր դոլարներ են ուղարկել TURKEN-ին։ Ընդդիմադիր գործիչն էլ պնդում է, որ Էրդողանի ընտանիքը ԱՄՆ-ում հիմնադրամ է բացել և ավելի քան 60 միլիոն դոլար է փոխանցել TÜRGEV-ի և Ensar-ի միջոցով։
Էրդողանի ղեկավարած իշխող Արդարություն ու զարգացում կուսակցության խոսնակ Օմեր Չելիքը պատասխանելով Քըլըչդարօղլուի հայտարարություններին ասել է, որ դրանք զրպարտություն են։
«Քըլըչդարօղլուն բազմաթիվ անհիմն մեղադրանքներ է հնչեցրել և ասել՝ ես փաստաթղթեր կբացահայտեմ։ Բայց նրա հայտարարությունները ոչ մի հետևանք չեն ունեցել: Այդ բոլոր հայտարարությունները ոչինչ չեն առաջացրել, բացի շրջակա միջավայրի աղտոտումից»,-թվիթերյան իր էջում գրել է Չելիքը։
Էմմա Չոբանյան
