28.07.2026 | 19:12
Ինֆանտինոյի և Թրամփի կապերը․ Կոնգրեսը սպասում է ՖԻՖԱ-ի ղեկավարի բացատրություններին
Ալիևը զանգահարել է Էրդողանին ու զեկուցել բրյուսելյան հանդիպման արդյունքների մասին
Քաղաքականություն
24.05.2022 | 12:00
Ադրբեջանի նախագահ Իլհամ Ալիևը նախօրեին զանգահարել է Թուրքիայի նախագահ Ռեջեփ Թայիփ Էրդողանին ու զեկուցել մայիսի 22-ին Բրյուսելում Հայաստանի վարչապետի ու ԵԽ նախագահի հանդիպման արդյունքների մասին։ Ադրբեջանական լրատվամիջոցների փոխանցմամբ՝ Ալիևը նշել է, որ հանդիպման ընթացքում քննարկվել են Հայաստանի ու Ադրբեջանի միջև խաղաղության պայմանագրի նախապատրաստման հարցերը, հայ-ադրբեջանական հարաբերությունների կարգավորումը, սահմանի դելիմիտացիան, տրանսպորտային հաղորդակցությունների բացումը։
«Ադրբեջանի նախագահը դրական է գնահատել եռակողմ հանդիպման արդյունքները»,-ասվում է հաղորդագրության մեջ։
Ալիևը կրկին խոսել է, այսպես կոչված, «Զանգեզուրի միջանցքից», այն դեպքում երբ ԵԽ նախագահ Շառլ Միշելի՝ հանդիպման արդյունքներն ամփոփող հայտարարության մեջ խոսվում է հաղորդակցության ուղիների մասին։
«Նախագահ Ալիևը ընդգծել է, որ կողմերը պայմանավորվածություն են ձեռք բերել «Զանգեզուրի միջանցքի» բացման շուրջ, այդ թվում՝ և՛ երկաթուղու, և՛ ավտոմոբիլային ճանապարհի անցկացման հարցի շուրջ»,-ասվում է հաղորդագրության մեջ։
Էրդողանն էլ իր հերթին բարձր է գնահատել Բրյուսելում կայացած հանդիպումից հետո ձեռք բերված դրական արդյունքները։
«Ադրբեջանի և Թուրքիայի նախագահները նշել են տարածաշրջանում շուտափույթ խաղաղության հասնելու կարևորությունը»,-ասվում է հաղորդագրության մեջ։
Բացի այդ Ալիևն ու Էրդողանը մտքեր են փոխանակել նաև երկկողմ համագործակցության և ապագա շփումների շուրջ։ Ի դեպ, ուշագրավ է, որ Բրյուսելում կայացած եռակողմ հանդիպումից հետո պաշտոնական Բաքուն որևէ հայտարարություն չի տարածել հանդիպման արդյունքների մասին՝ ի տարբերություն հայկական կողմի ու Եվրոպական խորհրդի։
Էմմա Չոբանյան
