09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Չավուշօղլուն հայտնել է, որ Բլինքենի հետ քննարկել են Հայաստանի հետ հարաբերությունների կարգավորումը
Քաղաքականություն
19.05.2022 | 12:25
Թուրքիայի ԱԳ նախարար Մևլութ Չավուշօղլուն ԱՄՆ պետքարտուղար Էնթոնի Բլինքենի հետ ռազմավարական մեխանիզմի շրջանակում կայացած հանդիպումից հետո լրագրողների հետ զրույցում հայտնել է, որ այն անցել է «շատ դրական» մթնոլորտում։ Թուրքական լրատվամիջոցների հաղորդմամբ՝ Չավուշօղլուն նշել է, որ քննարկվել է Անկարային F-16 կործանիչների վաճառքի հարցը։
«Մինչ այժմ Կոնգրեսի ուղերձների ընդհանուր մեծամասնությունը դրական է եղել։ Մենք քննարկել ենք մեր երկկողմ հարաբերություններին առնչվող հարցեր, քննարկել ենք նաև Թուրքիային պաշտպանական արդյունաբերության արտադրանքի՝ F16-երի մատակարարման հարցը։ Ընդգծել ենք մեր էներգետիկ համագործակցության կարևորությունը»,- ասել է Թուրքիայի ԱԳ նախարարը։
Նա տեղեկացրել է, որ քննարկվել է նաև Հայաստանի հետ հարաբերությունների կարգավորման գործընթացը։
«Մենք քննարկել ենք նաև Հայաստանի հետ հարաբերությունների կարգավորումը, Ուկրաինայում իրավիճակը, Սիրիան, Լիբիան և տարածաշրջանային հարցեր։ Մենք ասել ենք, որ Ուկրաինայում ընթացող պատերազմը պետք է հնարավորինս շուտ դադարեցվի»,- նշել է Չավուշօղլուն։
Հիշեցնենք, որ Հայաստանի ու Թուրքիայի հարաբերությունների կարգավորման գործընթացի շրջանակում երկու երկրների բանագնացների վերջին հանդիպումը տեղի է ունեցել մայիսի 3-ին Վիեննայում։
Էմմա Չոբանյան
