Իսրայելը կարծում է, որ Արցախի գրավյալ տարածքները ներուժ ունեն՝ Ադրբեջանի հետ գյուղոլորտում համագործակցության զարգացման համար

Ադրբեջանի նախագահ Իլհամ Ալիևն այսօր ընդունել է Իսրայելի գյուղատնտեսության ու գյուղական շրջանների զարգացման նախարար Օդեդ Ֆորերի պատվիրակությանը։ Ադրբեջանական լրատվամիջոցների հաղորդմամբ՝ իսրայելցի նախարարը նշել է, որ Արցախի գրավյալ տարածքները լավ ներուժ ունեն գյուղատնտեսության ոլորտում երկու երկրների միջև համագործակցության զարգացման համար։

«Կողմերը քննարկել են երկու երկրների տնտեսական հարաբերությունները, գյուղատնտեսության ոլորտում համագործակցության հեռանկարները, մտքեր են փոխանակել Ադրբեջանի գյուղատնտեսության մեջ իսրայելական ժամանակակից տեխնոլոգիաների կիրառման շուրջ»,- ասվում է հաղորդագրության մեջ։

Ալիևը նշել է, որ Արցախի գրավյալ տարածքներում սկսվել է գյուղատնտեսական նախագծերի իրականացումը, և «որոշակի արդյունքներ արդեն իսկ կան»։

Ֆորերը կարևորել է «Caspian Agro 2022» միջազգային գյուղատնտեսական ցուցահանդեսի անցկացումը Բաքվում և ասել, որ իր հետ Ադրբեջան ժամանած պատվիրակության կազմում են մեծ թվով ընկերություններ՝ մասնակցելու ադրբեջանա-իսրայելական գյուղատնտեսական բիզնես ֆորումին։

«Նշելով, որ Իսրայելն ունի լավ փորձ գյուղատնտեսության ոլորտում, նախարարը պատրաստակամություն է հայտնել իր ադրբեջանցի գործընկերների հետ կիսվել դրանով։ Ֆորերը նաև ընդգծել է, որ Ադրբեջանում ձեռք բերված զարգացումը մեծ հնարավորություններ է ստեղծել, և Ղարաբաղյան շրջանը համագործակցության լավ ներուժ ունի»,- ասվում է հաղորդագրության մեջ։

Հավելենք, որ իսրայելական լրատվամիջոցներն ավելի վաղ ազդարարել էին գյուղոլորտի մասնագետների պատվիրակության այցը Բաքու։ Իսրայելը ծրագրում է ադրբեջանական կողմին տրամադրել նորագույն գյուղատնտեսական տեխնոլոգիաներ ցորենի աճեցման համար՝ արդեն 2025 թվականին այն Ադրբեջանից գնելու նպատակով։

Էմմա Չոբանյան