Հասարակություն
14.05.2022 | 20:00Երևանի թիվ 187 միջնակարգ դպրոցում մայիսի 12-ին տեղի ունեցավ միջոցառում՝ նվիրված Արցախյան 44-օրյա պատերազմում նահատակված զինվորների հիշատակին: Պատերազմում այս դպրոցը տվել է 6 զոհ:
Միջոցառմանը ներկա էին պատերազմում ընկած զինվորների ծնողները, կանայք, երեխաները, պատերազմի մասնակից տղաները և այլ հյուրեր:
Նախաձեռնությունը դպրոցի ուսուցչուհի Գայանե Շահվերդյանինն է, որի եղբայրը՝ Նորայր Շահվերդյանը, զոհվել է Արցախյան առաջին պատերազմում: Մեզ հետ զրույցում նա ասաց, որ միջոցառումը նվիրված է Արցախյան առաջին, 44-օրյա պատերազմներում զոհված տղաների հիշատակին, նաև՝ հայոց բանակի 30-ամյակին:
«Աշակերտներն անհանբեր սպասում էին այս միջոցառմանը, քանի որ ամիսներով պատրաստվել ենք, իրենք էլ մեծ ոգևորությամբ են ամեն ինչ արել: Ցանկանում էինք հունվարին կազմակերպել, սակայն համավարակի պատճառով հետաձգեցինք մինչև մայիս»,- ասաց Գայանե Շահվերդյանը:
Աշակերտները ներկայացրին զոհված տղաներից յուրաքանչյուրի կյանքը՝ մանկությունից մինչև Արցախյան 44-օրյա պատերազմ: Նրանք շնորհակալագրեր հանձնեցին զոհված զինվորների ծնողներին:
«Այսօր մեր աշակերտներն իրենց ռազմահայրենասիրական ոգու շնորհիվ հուզմունքի և ուրախության պահեր շնորհեցին, նրանք խոստացան պահպանել հայոց բանակի հպարտությունն ու արժանապատվությունը: Շնորհակալ եմ մեր հերոս տղաներին և հերոսածին մայրերին, որոնք ևս մեկ անգամ իրենց մեջ կարողացան ուժ գտնել, և իրենց կամքով ապրեցնել բոլորիս»,-ասաց Գայանե Շահվերդյանը:
Դպրոցի տնօրեն Վյաչեսլավ Ղևոնդյանի խոսքով՝ սփոփել պատերազմում զոհված տղաների հարազատներին՝ անհնար է, սակայն պետք է գիտակցել, որ նրանք իրենց կյանքը զոհաբերել են հանուն հայրենիքի և հայ ազգի լինելության:
«Այսօր յուրաքանչյուրիս պարտքն է տղաների երազած երկիրը կառուցել, իսկ այդ ճանապարհին հուսահատվելու, վհատվելու իրավունք չունենք: Արցախյան 44-օրյա պատերազմի մասնակիցներ, ցավում եմ, որ ձեր աչքերով տեսել եք և՛ մահը, և՛ ընկերոջ կորուստը, և՛ ամեն արհավիրք, որը բերում է իր հետ պատերազմը»,- ասաց դպրոցի տնօրենը:
11-րդ դասարանի աշակերտուհի Մերի Ղարիբյանը մեզ հետ զրույցում ասաց․
«Մենք ամեն օր հավաքվում էինք, մեր հուզմունքը զսպելով՝ փորձեր անում, բայց բեմին շատերս հուզվեցինք: Իսկ տարրական դասարանի երեխաները սկզբում չէին գիտակցում՝ ինչի համար է այս ամենը, բայց անընդհատ մեզ հետ շփվելով, պատերազմի թեմաներից խոսելով՝ իրենք հասկացան լրջությունն ու այսօր իրենց արդարացրին»,- ասում է Մերի Ղարիբյանը:
Վերջերս դպրոցի բակում տեղադրվել է նաև Արցախյան առաջին և 44-օրյա պատերազմներում զոհված տղաների հիշատակին նվիրված հուշարձան-պուրակ: Միջոցառման ավարտին ներկաներից շատերը ծաղիկներ խոնարհեցին հուշարձան-պուրակի առջև:
Անի Թամրազյան
ԵՊՀ Ժուռնալիստիկայի ֆակուլտետի 4-րդ կուրսի ուսանողուհի
