18.05.2026 | 20:13
«Ռոսկոսմոսը» սկսել է գովազդներ տեղադրել հրթիռների վրա, որով հարյուր միլիոնավոր ռուբլիներ է վաստակում
Թուրքերի շուրջ 60%-ը չի հավատում, որ Էրդողանը կարող է վերականգնել երկրի տնտեսությունը
Քաղաքականություն
09.05.2022 | 23:30
Թուրքիայի յուրաքանչյուր 10 քաղաքացուց գրեթե 6-ը չի հավատում, որ նախագահ Ռեջեփ Թայիփ Էրդողանը կարող է լուծել երկրի տնտեսական խնդիրները: Այս մասին ասվում է MetroPOLL Research-ի անցկացրած նոր հետազոտության մեջ, գրում են թուրքական լրատվամիջոցները։
Հետազոտության արդյունքներն իր թվիթերյան էջում ներկայացրել է ընկերության հիմնադիր Օզեր Սենջարը։
Հարցման մասնակիցների 59 տոկոսը «ոչ» է պատասխանել հարցին՝ «Ինչ եք կարծում՝ Էրդողանը կարո՞ղ է լուծել տնտեսական խնդիրները», իսկ 39 տոկոսը՝ «այո»:
Հարցումը նաև ներկայացնում է տվյալներ քաղաքացիների կուսակցական նախընտրությունների մասին։ Մասնավորապես, իշխող «Արդարություն և զարգացում» կուսակցության ընտրողների 90 տոկոսը հավատում է, որ Էրդողանի կառավարությունը կարող է վերականգնել տնտեսությունը, մինչդեռ 8,8 տոկոսն այլ կերպ է կարծում։ «Ազգայնական շարժում» կուսակցության ընտրողների շրջանում Էրդողանի նկատմամբ հավատը կազմել է 73,1 տոկոս, իսկ հիմնական ընդդիմադիր Ժողովրդահանրապետական, İYİ («Լավ») և Ժողովուրդների դեմոկրատական կուսակցությունների աջակիցների ավելի քան 90 տոկոսն իր անվստահությունն է հայտնել այդ հարցում։
Հետազոտության մասնակիցներին նաև հարց է ուղղվել՝ արդյո՞ք կարծում են, թե «ընդդիմադիր կուսակցությունները կարող են լուծել տնտեսական խնդիրները», որին 53,2-ը տոկոսը պատասխանել է «ոչ»։
Ժողովրդահանրապետական կուսակցության ընտրողների շուրջ 78 տոկոսը կարծում է, որ ընդդիմությունը կարող է լուծել երկրի տնտեսական խնդիրները, մինչդեռ İYİ կուսակցության ընտրողների դեպքում այս ցուցանիշը կազմել է 69 տոկոս, քրդամետ Ժողովուրդների դեմոկրատական կուսակցության ընտրողների պարագայում՝ 64 տոկոս, իշխող կուսակցության ընտրողների դեպքում՝ 11 տոկոս, իսկ «Ազգայնական շարժման» ընտրողների պարագայում՝ 17 տոկոս։
Էմմա Չոբանյան
