Ինչ է լինելու Փաշինյանի հրաժարականից հետո․ Իշխան Սաղաթելյանը ներկայացրեց անելիքները․ ՏԵՍԱՆՅՈւԹ

Ֆրանսիայի հրապարակում այսօր տեղի ունեցավ ընդդիմության հանրահավաքը:

Իշխան Սաղաթելյանը «Դիմադրության» շարժման հանրահավաքի ժամանակ ներկայացրեց, թե ինչ է սպասվում Նիկոլ Փաշինյանի հրաժարականից հետո:

«Արցախը, Հայաստանի անկախությունը վտանգված են ապազգային, ապիկար իշխանության պատճառով։  Այս վիճակը պարտավոր ենք շտկել, իսկ ելքը անվտանգություն-համերաշխություն-կայունություն-առաջընթաց շղթայով ուժեղ Հայաստանի կերտումն է»,-  հայտարարեց ՀՅԴ ԳՄ ներկայացուցիչ Իշխան Սաղաթելյանը:

Նրա խոսքով՝ ուժեղ Հայաստան կերտելու համար նախ պետք է հեռացնել գործող իշխանությունը և ստեղծել նոր իշխանություն, որը.

• կապահովի թուրք-ադրբեջանական արտաքին ագրեսիայի զսպումը՝ արդիականացնելով Հայաստանի ու Արցախի միասնական անվտանգության համակարգը: Այն հիմված է ռազմավարական գործընկեր երկրների ներգրավման, Հայոց զինված ուժերի վերակառուցման, նոր որակի միջազգային դիվանագիտության վրա,
• կվերահաստատի Արցախի ժողովրդի անվտանգության և ինքնորոշման իրավունքի երաշխավոր լինելու՝ Հայաստանի Հանրապետության հանձնառությունը՝ բացառելով Արցախի որևէ կարգավիճակ Ադրբեջանի կազմում և առանց Հայաստանի հետ հուսալի ցամաքային կապի Արցախի անկլավային վիճակ: Գործուն քայլերը ուղղված են լինելու 1994 թ. ԵԱՀԿ ձևաչափով և նպատակներով բանակցային գործընթացի վերականգնմանը,
• կբացառի Հայաստանի ինքնիշխանության և տարածքային ամբողջականության հաշվին հաղորդակցության ուղիների ապաշրջափակման անվան տակ միջանցքների տրամադրումը,
• Ադրբեջանի կողմից ուժի կիրառման և ուժի կիրառման սպառնալիքի ներքո չի իրականացնի սահմանազատում և սահմանագծում,
• Հայաստան-Թուրքիա հարաբերություններում կբացառի որևէ համաձայնություն, որը հարցականի տակ կդնի հայ ժողովրդի հայրենազրկման և ցեղասպանության իրողությունը, ինչպես նաև հայության հոգևոր-մշակութային ժառանգության կրողը լինելու իրավունքը,
• առաջնահերթ կարևորություն կտա պարենային անվտանգությանը և պետական պահուստի խնդիրներին։
• կարևորագույն խնդիր կդիտարկի հայ ռազմագերիների, պատանդառվածների ու պահվող այլ անձանց վերադարձը,
• կվարի պրոֆեսիոնալիզմի և հստակ չափորոշիչներով կադրային քաղաքականություն՝ ապահովելով կառավարման համակարգային ճգնաժամի հաղթահարում

«Նոր Կառավարությունում որևէ օդիոզ դեմք չի լինելու,- իր ելույթի ժամանակ ասաց Իշխան Սաղաթելյանը։ – Սփյուռքի, Հայ Առաքելական սուրբ եկեղեցու և ազգային մյուս կառույցների անմիջական ներգրավմամբ կձևավորեն ներքին ու արտաքին մարտահրավերները դիմագրավելու համահայկական հստակ օրակարգեր։ Այդպիսի իշխանություն ձևավորելու համար անհրաժեշտ է Ազգային համաձայնության ժամանակավոր կառավարություն: Սա նշանակում է՝ դերակատար քաղաքական ուժերը ստանձնում են հավաքական պատասխանատվություն՝ ձևավորելով պետության կառավարման յուրահատուկ «ազգային հավաքական»:

Հիշեցնենք, որ մայիսի 1-ից Ֆրանսիայի հրապարակը փակ է, ցուցարարները վրաններ են տեղադրել և գիշերում են այնտեղ: Վերջիններս հայտարարել են, որ իրենց պայքարն անժամկետ է, ակցաները՝ ամենօրյա:

Մանրամասները՝ տեսանյութում։