08.06.2026 | 16:27
ԲՀԿ-ն վերահաշվարկ է սկսել․ պնդում է՝ կան անհամապատասխանություններ արձանագրությունների և ԿԸՀ-ում նշված տվյալների միջև
Էրդողանը մայիսի վերջին կայցելի Ադրբեջան՝ մասնակցելու TEKNOFEST տեխնոլոգիական փառատոնին
Քաղաքականություն
09.05.2022 | 13:10
Թուրքիայի նախագահ Ռեջեփ Թայիփ Էրդողանը մայիսի 26-29-ն այցելելու է Ադրբեջան՝ մասնակցելու «TEKNOFEST Azerbaijan» փառատոնին, գրում են ադրբեջանական լրատվամիջոցները՝ վկայակոչելով թուրքական ԶԼՄ-ին։
Նշվում է, որ Էրդողանի հետ միասին Ադրբեջան է այցելելու նաև նրա փեսան՝ թուրքական «Բայքար» ընկերության տեխնիկական գծով տնօրեն ու TEKNOFEST օդատիեզերական և տեխնոլոգիական փառատոնի խորհրդի նախագահ Սելջուկ Բայրաքթարը, ինչպես նաև արդյունաբերության ու տեխնոլոգիաների նախարար Մուսթաֆա Վարանքը։
Նշենք, որ TEKNOFEST-ը Թուրքիայի ամենամեծ ավիացիոն, տիեզերական և տեխնոլոգիական փառատոնն է: Միջոցառումը 2018 թվականից ամեն տարի կազմակերպվում է Թուրքիայի տեխնոլոգիական թիմ հիմնադրամի (T3) և Արդյունաբերության և տեխնոլոգիաների նախարարության կողմից: Ադրբեջանը փառատոնին առաջին անգամ մասնակցել է 2021 թվականին։
Այս տարի փառատոնն առաջին անգամ անցկացվում է Թուրքիայի սահմաններից դուրս՝ Ադրբեջանում։ Բաքվում այն կազմակերպում է Թուրքիայի տեխնոլոգիական թիմ հիմնադրամը (T3), Ադրբեջանի Թվային զարգացման և տրանսպորտի նախարարությունը և Թուրքիայի Արդյունաբերության ու տեխնոլոգիաների նախարարությունը։
Հիշեցնենք նաև, որ Ադրբեջանի նախագահ Իլհամ Ալիևն իր հերթին օրերս այցելելու է Թուրքիա։ Մայիսի 14-ին Ալիևն Էրդողանի հետ մասնակցելու է Ռիզե-Արդվին օդանավակայանի բացմանը։
Էմմա Չոբանյան
