28.06.2026 | 18:42
Սաուդյան Արաբիայում ուղղաթիռի կործանման հետևանքով 14 մարդ է զոհվել
Թուրքիայի ընդդիմությունը վտանգում է կորցնել նախագահական ընտրություններում Էրդողանին հաղթելու հնարավորությունը․ Financial Times
Քաղաքականություն
06.05.2022 | 22:50
Թուրքիայի գլխավոր ընդդիմադիր կուսակցության առաջնորդ Քեմալ Քըլըչդարօղլուն անցյալ շաբաթ ամբիոն բարձրացավ՝ ներկայացնելու նախագահ Ռեջեփ Թայիփ Էրդողանին առաջիկա 13 ամսում կայանալիք ընտրություններում հաղթելու իր տեսլականը, գրում է Financial Times, որի հրապարակումը ներկայացնում է «Ահվալ» գործակալությունը։
Քըլըչդարօղլուն օգնել է Էրդողանի իշխող «Արդարություն և զարգացում» կուսակցության (AKP) դեմ ապշեցուցիչ հաղթանակ տանել 2019 թվականի տեղական ընտրություններում: Նրան է վերագրվում նաև հակադիր քաղաքական հայացքներով ընդդիմադիր կուսակցությունների դաշինք ստեղծելու միտքը՝ ընդդիմանալու Էրդողանի իշխանությանը և նրա ամրապնդած նախագահական համակարգին։
Լրատվամիջոցը նշում է, որ գնաճը հասել է երկու տասնամյակի ամենաբարձր մակարդակին՝ գրեթե 70 տոկոս, և երկրում բնակվող գրեթե 4 միլիոն փախստականների հետ կապված հանրային դժգոհությունն ընդդիմությանը տալիս է Էրդողանին հաղթելու լավագույն հնարավորությունը՝ 2003 թվականին նրա իշխանության գալուց ի վեր։
Financial Times-ի լրագրող Լաուրա Պիտելը, վկայակոչելով վերլուծաբաններին, նշում է, որ միաժամանակ աճում են մտահոգությունները, որ ընդդիմադիր դաշինքը վտանգում է կորցնել այդ հնարավորությունը։
Էրդողանը սոցհարցումներում որոշակի առավելություն է ստացել ուկրաինական պատերազմի մեկնարկից հետո, որում նա ձգտում է միջնորդի դեր խաղալ։ Նախորդ ամիս Հունգարիայի ընտրություններում, որտեղ Վիկտոր Օրբանը հաղթեց վեց ընդդիմադիր կուսակցությունների դաշինքին, ևս նախազգուշացումներ է տալիս, որ Թուրքիայի ընդդիմությունը կարող է բարդ խնդրի առաջ կանգնել Էրդողանին տապալելու համար:
«Եթե ինձ հարցնեիք անցյալ տարի, ես կասեի՝ հաղթանակը գրպանում է։ Էրդողանը պարտվելու է։ Հիմա ես ավելի քիչ եմ համոզված»,- FT-ին ասել է ընդդիմադիր գործիչներից մեկը։ Լրատվամիջոցը նշում է, որ ընդդիմության որոշ ներկայացուցիչներ վախենում են, որ Էրդողանը «ողջ-ողջ կուտի» Քըլըչդարօղլուին, եթե վերջինը պնդի առաջադրել իր թեկնածությունը։
Metropoll-ի հետազոտության համաձայն՝ Անկարայի և Ստամբուլի քաղաքապետները, որոնք նույն CHP կուսակցությունից են և լավ են գնահատվում վերլուծաբանների և բազմաթիվ գործընկեր քաղաքական գործիչների կողմից, 9 կետով կհաղթեն առնվազն Էրդողանին։
«Քըլըչդարօղլուն շատ է ուզում առաջադրվել։ Չեմ կասկածում, որ նա կդառնար բոլոր հնարավոր թեկնածուներից լավագույն նախագահը։ Բայց նա հաղթելու ամենացածր շանսերն ունի»,- ասել է CHP-ի հետ դաշնակից ընդդիմադիր հինգ այլ կուսակցություններից մեկի բարձրաստիճան պաշտոնյան:
Վերջնական որոշումը՝ ով է առաջադրվելու, կայացվելու է ընդդիմադիր կուսակցությունների առաջնորդների կուլիսային բանակցություններում։ Այստեղ առանցքային դերակատարում ունի աջակողմյան «Լավ» կուսակցության ղեկավար Մերալ Աքշեները։ Նա ձգտում է այնպիսի մրցակցի, որը կարող է հեշտությամբ հաղթել Էրդողանին ընտրությունների առաջին փուլում։ Կան ազդանշաններ, որ Աքշեները հավանություն է տալիս Ստամբուլի քաղաքապետ Էքրեմ Իմամօղլուին, ում նա համեմատել է օսմանյան սուլթան Մեհմեդ Նվաճողի հետ․ հենց նա է 1453 թվականին գրավել Կոստանդնուպոլիսը, որն այժմ կոչվում է Ստամբուլ։
Էմմա Չոբանյան
