Ընդդիմադիրների երթին միացած մտավորականները պետք է դատապարտեն ատելության խոսքն ու բռնությունը. ՏԵՍԱՆՅՈՒԹ

«Փողոցային պայքարի ելած ընդդիմությունը խորհրդարանական ընդդիմություն է և ունի իր ուզած հարցերը խորհրդարանում բարձրացնելու բոլոր լծակները: Դիմում եմ նրանց`եթե պահանջում եք Փաշինյանի հրաժարականը, խնդրե´մ, խորհրդարանը ձեր ձեռքի տակ է: Փողոցային պայքարի է ելնում այն ընդդիմությունը, որը խորհրդարանում խնդիրներ բարձրացնելու հնարավորություն չունի: Իրենք կարող են իրենց դիրքորոշումն արտահայտել նաև հրաժարականներ տալով, մանդատներ վայր դնելով, ոչ թե փողոց փակելով»,- Factor TV-ի հետ զրույցում նման տեսակետ է հայտնում ճարտարապետ Անահիտ Թարխանյանը:

Նա անդրադառնում է նաև ընդդիմադիրների կողմից ժողովրդին ուղղված ատելության խոսքի դրսևորումներին, ինչպես նաև քաղաքացիների նկատմամբ բռնության դեպքերին.

«Ընդդիմադիրների երթին միացած մտավորականները պետք է դատապարտեն ատելության խոսքն ու բռնությունը, պետք է թույլ չտա, որ լարում տեղի ունենա մարդկանց միջև: Ժամանակին նույնքան անընդունելի էին Փաշինյանի` «ասֆալտին փռելու» մասին արտահայտությունները: Մյուս կողմից, ինձ համար զարմանալի է ոստիկանության պահվածքը. հանրության շրջանում կտրուկ լարման ի հայտ գալու պատճառը հաճախ հենց ոստիկանությունն է»:

Անահիտ Թարխանյանը խոսում է նաև հանրության շրջանում տիրող տրամադրություններից, սեփական մտորումներից.

«2018-ից հանրության մի ստվար զանգված հիասթափությունների փուլերով է անցնում, մարդկանցից շատերը մտածեցին, որ ժողովրդավարական ուժ է եկել իշխանության, բայց նրանց ակնկալիքները չարդարացան: Հայ ժողովուրդը 30 տարի շարունակ գրեթե տարի չի եղել, որ փողոց դուրս չգա և չպայքարի իր ապագայի համար: Մինչ օրս էլ դժվար է խորհրդային կարգերի փլուզումից հետո պոկվել Ռուսաստանից և դուրս գալ ազգային ճանապարհի վրա»:

Մանրամասները`տեսանյութում:

Աննա Բաբաջանյան