14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Պուտինը չի հաղթի Ուկրաինայի դեմ հանցավոր պատերազմում․ Շոլց
Քաղաքականություն
06.05.2022 | 22:13
Ռուսաստանի նախագահ Վլադիմիր Պուտինը «չպետք է հաղթի Ուկրաինայի դեմ ագրեսիայի հանցավոր պատերազմում, և նա չի հաղթի այս պատերազմում»: Այս մասին հայտարարել է Գերմանիայի կանցլեր Օլաֆ Շոլցը մայիսի 6-ին Համբուրգում ելույթ ունենալով ակումբներից մեկի 100-ամյակին նվիրված միջոցառմանը։
Նրա խոսքով՝ Կրեմլի ագրեսիան «մեր ժամանակների ամենամեծ աղետն է», «ոչնչացման պատերազմ», որից հետո «աշխարհն այլևս նախկինի նման չի լինի»։ Շոլցը ևս մեկ անգամ ընդգծել է Գերմանիայի կառավարության համերաշխությունը Ուկրաինայի հետ, գրում է DW-ի ռուսական ծառայությունը։
«Մենք Ուկրաինային տրամադրում ենք ողջ աջակցությունը, որ կարող ենք տրամադրել, ներառյալ՝ զենքի մատակարարումը, որպեսզի նա կարողանա պաշտպանվել»,- ընդգծել է Գերմանիայի կառավարության ղեկավարը։
Հարձակվելով Ուկրաինայի վրա՝ «Պուտինը և նրա ռեժիմը փաստացի կոտրեցին ժամանակակից քաղաքակրթությունը»՝ միտումնավոր հեռանալով համաշխարհային հանրությունից, ինչը 21-րդ դարում հնարավոր էին համարում միայն մի քանիսը, ասել է Օլաֆ Շոլցը՝ հավելելով, որ Պուտինի համար «Ռուսաստանի հզորության և մեծության մասին իմպերիալիստական և ռևանշիստական գաղափարներն» ավելի շատ բան են նշանակում, քան «սեփական ժողովրդի բարեկեցությունը»։
«Եթե Պուտինին հաջողվի հասնել իր նպատակներին, համաշխարհային մասշտաբով իրական անօրինություն կլինի։ Միայն այդ պատճառով Ռուսաստանը չպետք է հաղթի»,- ասել է Շոլցը։
Տաթև Ֆռանգյան
