08.06.2026 | 15:44
Պեսկովը հայտարարել է, թե Կրեմլն արձանագրում է Հայաստանում ընտրախախտումների մասին հաղորդագրությունները
Գյումրու քաղաքապետը մեկնել է Ֆրանսիա
Հասարակություն
04.05.2022 | 22:09
Գյումրու քաղաքապետ Վարդգես Սամսոնյանը «Դաշինք՝ հանուն կայուն և կանաչ կառավարման» ծրագրի շրջանակում մեկ շաբաթով մեկնել է Ֆրանսիա։ Գյումրու համայնքապետարանից նրան որևէ մեկը չի ուղեկցում։
Այս մասին տեղեկացանք քաղաքապետի մամուլի խոսնակ Սոնա Առաքելյանից։
«Դաշինք՝ հանուն կայուն և կանաչ կառավարման» ծրագիրը Գյումրիում և Վանաձորում իրականացվելու է Լեհաստանի Պիլա քաղաքի հետ փորձի փոխանակման միջոցով։
Ծրագիրը նպատակ ունի նպաստել Հայաստանի երկու խոշոր քաղաքների կայուն կառավարմանը, նպաստել համայնքային ծառայություններին ու քաղաքաշինական ոլորտին առնչվող փաստաթղթերի մշակմանը, դրանք դարձնել Եվրամիության չափանիշներին համապատասխան։
Այս ծրագրով նախատեսված է նաև մաքուր շրջակա միջավայր ստեղծել, աջակցել Գյումրիում և Վանաձորում «կանաչ» հանրային տրանսպորտի ներդրմանը և պլաստիկ թափոնների վերամշակմանը։
Ինչպես ավելի վաղ տեղեկացրել էինք, Գյումրիում այս ծրագրի շրջանակում ձեռք է բերվելու 23 տեղանոց 5 էլեկտրական ավտոբուս, որոնք հարմարեցված կլինեն հաշմանդամություն ունեցող անձանց․ կունենան թեքահարթակներ, նստելու հարմարանքներ։ Գյումրու քաղաքապետարանի տրանսպորտի բաժնի պատասխանատուների տեղեկացմամբ, Եվրամիությունն այդ ծրագրի համար կհատկացնի 400-450 հազար եվրո։
Եվրամիության ծրագրով ձեռք կբերվի նաև նոր քարտային համակարգ, որով կաշխատեն էկոլոգիապես մաքուր նոր ավտոբուսները։
Արմիկ Մովսիսյան
