22.04.2026 | 23:30
ՀՀ տարածքում ավտոճանապարհները հիմնականում անցանելի են
Ալեքսեյ Նավալնին կարող է տեղափոխվել գաղութ, որտեղ բանտարկյալները խոշտանգումների են ենթարկվել
Քաղաքականություն
04.05.2022 | 20:09
Ռուսաստանցի ընդդիմադիր քաղաքական գործիչ Ալեքսեյ Նավալնին Կոռուպցիայի դեմ պայքարի հիմնադրամում խարդախության գործով դատավճռի օրինական ուժի մեջ մտնելուց հետո կտեղափոխվի Վլադիմիրի մարզի Մելեխովո գյուղի խիստ ռեժիմի ուղղիչ գաղութ։ Այս մասին Նավալնիին պատմել են գաղութի բանտարկյալները, գրում է VOA-ն։
«Իմ դատավճիռը դեռ ուժի մեջ չի մտել, բայց խիստ ռեժիմի Մելեխովո գաղութի բանտարկյալները գրում են, որ այնտեղ ինձ համար կահավորում են «բանտ՝ բանտի մեջ»։ Ասում են՝ եթե google-ում փնտրես Մելեխովո, կգտնես բանտարկյալների պատմությունները, թե ինչպես են այնտեղ ոտքեր պոկում։ Դե՝ գոնե առիթ կունենամ օգտագործելու թրենդային էմոջի»,- գրել է Նավալնին սոցիալական ցանցերում և հաղորդագրությանը կցել վարդագույն եղունգներով ժպտացող դեմք։
Մելեխովում գործում է 6-րդ խիստ ռեժիմի ուղղիչ գաղութը։ Անցյալ տարվա մարտին Mediazona-ն հրապարակել էր գաղութի նախկին բանտարկյալ Իվան Ֆոմինի 60 էջանոց նամակից հատվածներ: Դրանում Ֆոմինը նկարագրում է գաղութում ծեծի, խոշտանգումների և սեռական բռնության դեպքեր։
Նավալնին նոր գործով դատապարտվել է 2022 թվականի մարտի վերջին։ Դատարանը նրան դատապարտել է ինը տարվա ազատազրկման խիստ ռեժիմի գաղութում և 1,2 միլիոն ռուբլու տուգանքի՝ Կոռուպցիայի դեմ պայքարի հիմնադրամում նվիրատվություններ հավաքելու ժամանակ խարդախության և դատավորի նկատմամբ անհարգալից վերաբերմունքի համար։
Ընդդիմադիր գործիչը պնդում է իր անմեղության հարցում։ Նա և համախոհները կարծում են, որ քրեական հետապնդումը պայմանավորված է միայն քաղաքական դրդապատճառներով։ Իրավապաշտպան կազմակերպությունները Նավալնիին ճանաչում են որպես քաղբանտարկյալ։ Եվրամիությունը, ԱՄՆ նախագահ Ջո Բայդենը և բազմաթիվ հասարակական գործիչներ պահանջում էին նրան ազատ արձակել։
