Էրդողանի գործընկեր Բահչելին Զելենսկիին խորհուրդ է տվել հարգանքով խոսել Թուրքիայի և նրա կառավարության մասին

Թուրքիայի «Ազգայնական շարժում» կուսակցության նախագահ Դևլեթ Բահչելին արձագանքել է Ուկրաինայի նախագահ Վլադիմիր Զելենսկիի՝ Անկարային քննադատող հայտարարությանը և խուրհուրդ տվել նրան՝ հարգանքով խոսել Թուրքիայի մասին, գրում է ՏԱՍՍ-ը։

Ի դեպ, Բահչելիի կուսակցությունը Էրդողանի իշխող ուժի կոալիցիոն գործընկերն է։

«Զելենսկին պետք է օգտագործի շատ հարգալից տոն թուրք ժողովրդի, թուրքական պետության և Թուրքիայի կառավարության նկատմամբ։ Այսօր Թուրքիան միակ երկիրն է, որը ձգտում է կարգավորել պատերազմը Ստամբուլյան գործընթացի օգնությամբ։ Նախագահ Ռեջեփ Թայիփ էրդողանը դա իրականացնում է ավելի քան 40 երկրների ղեկավարների հետ շփումների միջոցով։ Զելենսկին պետք է մեր ազգին վստահի, ոչ թե Հունաստանին»,- ասել է Բահչելին։

Հիշեցնենք, որ Ուկրաինայի նախագահ Վլադիմիր Զելենսկին քննադատել էր Հունաստանին և Թուրքիային, որոնք հյուրընկալում են ռուս զբոսաշրջիկներին, կոչ անելով հրաժարվել երկակի ստանդարտներից։

«Ռուսական զբոսաշրջությունը շատ ու շատ տարիներ է, ինչ մեծ գումարներ է բերում Հունաստանին։ Մենք կարծում ենք, որ նրանք արյան վրա են վաստակում։ Նույն իրավիճակն է Թուրքիայում։ Թուրքիան մի կողմից հանդես է գալիս որպես միջնորդ և կարևոր քայլերով աջակցում է Ուկրաինային, իսկ մյուս կողմից՝ մենք տեսնում ենք զբոսաշրջային երթուղիների մշակում հատուկ ռուսական զբոսաշրջության համար։ Դա անհնար է, եթե մենք ցանկանում ենք ունենալ բարեկամական հարաբերություններ»,- ասել է Զելենսկին։

Էմմա Չոբանյան