ՀՀԿ-ական Ռուսլան Բաղդասարյանն ապօրինի գույքի բռնագանձման գործով Դատախազություն է հրավիրվել

ՀՀ դատախազությունն ապօրինի գույքի բռնագանձման գործերով շահագրգիռ անձ հանդիսացող Երևանի Դավթաշեն վարչական շրջանի նախկին ղեկավար Ռուսլան Բաղդասարյանին և նրա հետ փոխկապակցված անձ Արմինե Հարությունյանին ծանուցագրեր է ուղակել։

Այս մասին Factor.am-ը տեղեկանում է «Ազդարար» պաշտոնական հայտարարությունների կայքից։

ՀՀ գլխավոր դատախազությունը Բաղդասարյանին ծանուցել է, որ ապօրինի ծագում ունեցող գույքի բռնագանձման գործերով վարչությունում նրան պատկանող գույքի առնչությամբ իրականացվել է ուսումնասիրություն, որի արդյունքում կազմվել է ամփոփագիր: Դավիթաշենի նախկին ղեկավարը և նրա հետ փոխկապակցված Հարությունյանը մայիսի 5-ին պետք է ներկայանան Դատախազության համապատասխան վարչություն՝ ուսումնասիրությանը ծանոթանալու և դիրքորոշում ներկայացնելու համար։

Նշենք, որ ՀՀԿ-ական Ռուսլան Բաղդասարյանը վարչական շրջանի ղեկավարի պաշտոնում նշանակվել էր նախկին քաղաքապետ Տարոն Մարգարյանի օրոք՝ 2012 թվականին և այդ պաշտոնին մնացել մինչև 2018 թվականի հոկտեմբերը։

Բացի այդ՝ 2019 թվականին Բաղդասարյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով (առանձնապես խոշոր չափերով յուրացում), 314-րդ հոդվածով (պաշտոնեական կեղծիք) և 325-րդ հոդվածի 2-րդ մասով (փաստաթղթերի կեղծում, որը կատարվել է մի խումբ անձանց կողմից նախնական համաձայնությամբ): Ոստիկանությունը Դավթաշենի նախկին համայնքապետի աշխատակազմում մոտ 42 մլն դրամի չարաշահում էր բացահայտել:

Ըստ ոստիկանության՝ Դավթաշեն վարչական շրջանի նախկին ղեկավարի մտերիմները 2009-2018 թվականների ընթացքում թաղապետարանում տարբեր հաստիքների են հրամանագրվել, աշխատանքի չեն հաճախել, բայց աշխատավարձ են ստացել: Ոստիկանության պարզաբանմամբ՝ այդ մարդկանց անվամբ դուրս է գրվել շուրջ 42 միլիոն դրամ աշխատավարձ:

Ռոզա Վարդանյան