15.11.2024 | 20:20
Աբխազիայում բանակցություններ են սկսվել իշխանությունների և ընդդիմության միջև
«Թե՛ արտաքին, թե՛ ներքին իրավիճակում կայունացման միակ անփոխարինելի գործոնը Նիկոլ Փաշինյանն է»․ Ստյոպա Սաֆարյան. ՏԵՍԱՆՅՈՒԹ
Քաղաքականություն
30.04.2018 | 14:39
«Նիկոլ Փաշինյանի հայտարարությունն արտահերթ ընտրությունների մասով տրամաբանական շարունակությունն էր այն բանի, ինչ նա ասել էր ապրիլի 22-ին Սերժ Սարգսյանի հետ կարճ հանդիպումից հետո և իհարկե, արտահերթ խորհրդարանական ընտրությունները մի քանի առումներով պարտադիր են։ Առաջինը՝ ինչպես Սերժ Սարգսյանի հետ հանդիպման ժամանակ Փաշինյանն ասաց, եկել է իշխանությունը ժողովրդին փոխանցելու տարբերակը քննարկելու, ժողովրդին փոխանցել չի նշանակում իշխանությունը Նիկոլ Փաշինյանին փոխանցել և դրանով ավարտել։ Նիկոլ Փաշինյանն իրավացի է՝ նպատակը իշխանությունը ժողովրդին փոխանցելն է, և դա հնարավոր է միայն և միայն արտահերթ խորհրդարանական ընտրությունների միջոցով»,- Factor.am-ի հետ զրույցում ասաց քաղաքագետ, ՄԱՀԻ հիմնադիր Ստյոպա Սաֆարյանը։
Ըստ նրա, արտահերթ ընտրություններ անցկացնելու մյուս կարևոր պատճառը քաղաքական իրավիճակի արմատապես փոփոխվելն է, որին հասել են Նիկոլ Փաշինյանն ու աջակիցները․ «Եթե անգամ մեր ներկայիս խորհրդարանը ձևավորված լիներ լեգիտիմ օրենքի շրջանակներում, ինչն այդպես չէ, միևնույնն է, արտահերթ ընտրություններ պետք էին երկրի քաղաքական իրականությունը ճշգրիտ արտացոլելու համար։ Երկրորդ պատճառը՝ Նիկոլ Փաշինյանին հարկավոր է քաղաքական հենարան, թիմ»։
Սաֆարյանի խոսքով՝ մենք բավականին անկայուն և զգայուն վիճակում ենք գտնվում, անցումային փուլն ավարտված չէ և թե՛ արտաքին, թե՛ ներքին իրավիճակում կայունացման միակ անփոխարինելի գործոնը Նիկոլ Փաշինյանն է։ Քաղաքագետը նաև անդրադարձավ շարժման մեկնարկին, ընթացքին և գրանցած արդյունքներին։
Մանրամասները՝ տեսանյութում։
Լիլիթ Շաբոյան
