10.10.2026 | 15:55
Հոկտեմբերի 13-ից Հայաստանում սպասվում է անձրև և ամպրոպ
Մինչև 100․000 մարդ դեռ կարող է լինել Մարիուպոլի «Ազովստալ» գործարանում
Քաղաքականություն
02.05.2022 | 15:23
Շուրջ երկու ամիս տևած պաշարումից հետո ուկրաինական Մարիուպոլի պողպատի գործարանում ապաստանած խաղաղ բնակիչները շաբաթավերջին սկսել են տարհանվել: Այս մասին հայտնել են տեղի պաշտոնյաները՝ նշելով, որ քաղաքի այլ վայրերում ապաստանած մարդկանց նույնպես պետք է թույլատրվի հեռանալ, գրում է VOA-ն:
Կիրակի ուկրաինական ուժերի կողմից համացանցում հրապարակված տեսանյութում երևում է, որ տարեց կանայք և փոքր երեխաներով մայրերը մագլցում են «Ազովստալ» գործարանի փլատակների վրայով և նստում ավտոբուս: Ակնկալվում է, որ երկուշաբթի ավելի քան 100 խաղաղ բնակիչ կժամանի Ուկրաինայի կողմից վերահսկվող Զապորոժիե քաղաք, նախօրեին ասել է Ուկրաինայի նախագահ Վլադիմիր Զելենսկին։
Պողպատի գործարանի ուկրաինացի պաշտպանները կոչ են արել միջազգային կազմակերպություններին, այդ թվում՝ ՄԱԿ-ին և Կարմիր խաչին, ապահովել տարհանվածների անվտանգությունը։
Ազովի գնդի փոխհրամանատար Սվյատոսլավ Պալամարը Associated Press-ին ասել է, որ երաշխիքներ են անհրաժեշտ «երրորդ կողմի՝ քաղաքական գործիչների, համաշխարհային առաջնորդների կողմից, որոնք կբանակցեն ռուսական կողմի հետ՝ մեզ այստեղից հանելու համար»։ «Ազովստալ»-ի մեկ այլ պաշտպան ասել է, որ ռուս զինվորականները կիրակի վերսկսել են գործարանի հրթիռակոծումը, երբ ավարտվել է մի խումբ խաղաղ բնակիչների տարհանումը:
Ուկրաինայի Ազգային գվարդիայի 12-րդ օպերատիվ բրիգադի հրամանատար Դենիս Շլեգան կիրակի հեռուստահարցազրույցում ասել է, որ մի քանի հարյուր խաղաղ բնակիչներ դեռևս արգելափակված են գործարանում, ինչպես նաև մոտ 500 վիրավոր զինվորներ և «շատ դիակներ»։
«Մի քանի տասնյակ փոքր երեխաներ դեռ մնում են գործարանի տակ գտնվող բունկերում»,- ասել է Շլեգան:
Մինչև 100․000 մարդ դեռ կարող է լինել Մարիուպոլում, ներառյալ՝ շուրջ 2,000 ուկրաինացի մարտիկներ, որոնք թաքնված են խորհրդային ժամանակներին կառուցված հսկայական պողպատի գործարանում: Սա քաղաքի միակ հատվածն է, որը գրավված չէ ռուսական զորքերի կողմից։
Սվյատոսլավ Պալամարը Associated Press-ին ասել է, որ պողպատի գործարանում վիրավորներից մի քանիսին դժվար է հասնել:
«Փլատակներ են։ Մենք հատուկ տեխնիկա չունենք։ Զինվորների համար դժվար է մերկ ձեռքերով տոննաներ կշռող սալաքար բարձրացնել։ Մենք լսում ենք մարդկանց ձայները [ավերված շենքերի ներսում], ովքեր դեռ ողջ են»,- ասել է նա։
Տաթև Ֆռանգյան
