15.01.2025 | 13:40
Ստամբուլում մեկ օրում կեղծ ալկոհոլից 11 մարդ է մահացել
Մեծ Բրիտանիայի, Իտալիայի և Կանադայի վարչապետները շնորհավորել են Մակրոնին վերընտրվելու կապակցությամբ
Քաղաքականություն
25.04.2022 | 00:15
Մեծ Բրիտանիայի վարչապետ Բորիս Ջոնսոնը շնորհավորել է Ֆրանսիայի առաջնորդ Էմանուել Մակրոնին՝ Ֆրանսիայի նախագահական ընտրությունների երկրորդ փուլում տարած հաղթանակի կապակցությամբ։
«Էմանուել Մակրոն, շնորհավորում եմ Ֆրանսիայի նախագահի պաշտոնում վերընտրվելու կապակցությամբ: Ֆրանսիան մեր ամենամոտ և ամենակարևոր դաշնակիցներից մեկն է: Ես անհամբերությամբ սպասում եմ շարունակելու համագործակցությունը մեր երկրի և աշխարհի համար ամենակարևոր հարցերի շուրջ»,- գրել է Ջոնսոնը Twitter-ում:
Կանադայի վարչապետ Ջասթին Թրյուդոն ևս շնորհավորել է Էմանուել Մակրոնին՝ Ֆրանսիայի նախագահի պաշտոնում վերընտրվելու կապակցությամբ։
«Շնորհավորում եմ Էմանուել Մակրոնին»,- գրել է նա Twitter-ում: Թրյուդոն ասել է, որ «անհամբեր սպասում է» Մակրոնի հետ աշխատելուն այնպիսի թեմաների շուրջ, ինչպիսիք են կլիմայի փոփոխության դեմ պայքարը, ժողովրդավարության պաշտպանությունը և նոր աշխատատեղերի ստեղծումը:
Իտալիայի վարչապետ Մարիո Դրագին Էմանուել Մակրոնի վերընտրվելն անվանել է «հիանալի նորություն Եվրոպայի համար» և ասել, որ Իտալիան պատրաստ է շարունակել աշխատանքը Ֆրանսիայի հետ՝ Եվրամիության ամրապնդման համար։ Այս մասին ասվում է Իտալիայի կառավարության ղեկավարի կիրակի օրը տարածած հայտարարության մեջ։
«Ֆրանսիայի նախագահական ընտրություններում Էմանուել Մակրոնի հաղթանակը հիանալի նորություն է ողջ Եվրոպայի համար: Իտալիան և Ֆրանսիան, մյուս գործընկերների հետ միասին, կողք կողքի աշխատում են ԵՄ-ն ամրապնդելու համար՝ ի վիճակի լինելով հաղթահարելու մարտահրավերները՝ սկսած ուկրաինական ճգնաժամից»,- ասված է հայտարարության մեջ։
Ավելի վաղ Մակրոնին շնորհավորել էին Եվրահանձնաժողովի ու Եվրախորհրդի ղեկավարները։
Մակրոնը, նախնական տվյալներով ստացել է ձայների 57,6%-ը։ «Ազգային միավորման» թեկնածու Մարին Լը Պենը ստացել է ձայների 42,4%-ը։
