28.02.2026 | 10:18
Լարս ավտոճանապարհը փակ է բոլոր տեսակի տրանսպորտային միջոցների համար
Բեռլինում ադրբեջանցի քաղաքական էմիգրանտներն ակցիա են անցկացրել՝ բողոքելով Բաքվի կողմից ակտիվիստների նկատմամբ բռնաճնշումների դեմ. ԼՈՒՍԱՆԿԱՐՆԵՐ
Քաղաքականություն
22.04.2022 | 23:23
Գերմանիայում բնակվող ադրբեջանցի քաղաքական էմիգրատները բողոքի ակցիա են անցկացրել Գերմանիայի ԱԳՆ-ի, Բեռլինում Amnesty International-ի և Human Rights Watch-ի գրասենյակների առջև, գրում է Թուրան գործակալությունը։
Նրանք պահանջել են ազատ արձակել Գերմանիայից արտաքսված և Ադրբեջանի իշխանությունների կողմից Բաքվում ձերբակալված ակտիվիստներին։ Այս մասին հայտնել է DAS կազմակերպության անդամ Սիրուս Իբրահիմլին։
Նրա խոսքով՝ ակցիայի նպատակն էր ուշադրություն հրավիրել 2021 թվականի հունիս-նոյեմբերին Գերմանիայից արտաքսված ակտիվիստների՝ Մութալիմ Օրուջևի, Մալիք Ռզաևի, Ջաֆար Միրզոևի և Փյունխան Քարիմլիի բռնաճնշումների փաստերի վրա։ Նրանք ձերբակալվել են Ադրբեջանում թմրանյութերի ապօրինի շրջանառության մեղադրանքով և խոշտանգումների ենթարկվել։
Եվս մի ակտիվստ՝ մարտի 29-ին արտաքսված Սամիր Աշուրովը, 20 օր անց ձերբակալվել է դիտավորությամբ ծանր մարմնական վնասվածք պատճառելու մեղադրանքով։
Իբրահիմլին նշել է, որ բոլորը նախկինում մասնակցել են Գերմանիայում բողոքի ակցիաների՝ Ադրբեջանում մարդու իրավունքների խախտումների դեմ։ Սա հիմք է տալիս ենթադրելու, որ նրանց հետապնդում են քաղաքական դրդապատճառներով։
Ցույցի մեկ այլ կազմակերպիչ Հաջի Կալպալիզադեն էլ հայտարարել է, որ Ադրբեջան արտաքսվածների ձերբակալությունները կատարվել են միջազգային իրավունքի խախտմամբ։ Դրա համար ցուցարարները դիմել են Գերմանիայի ԱԳՆ-ին, ժողովրդավարական պետությունների դեսպանություններին և միջազգային կազմակերպություններին՝ կոչ անելով վերոնշյալ ակտիվիստներին քաղբանտարկյալ ճանաչել և Բաքվից պահանջել կատարել Ռեադմիսիայի համաձայնագրի սկզբունքները։
Ցուցարարների պահանջները փոխանցել են Գերմանիայի ԱԳՆ-ին, երկրում Amnesty International-ի և Human Rights Watch-ի գրասենյակներին։ Դիմումի տեքստում նաև նշվում է, որ Գերմանիայի իշխանությունները ևս պետք է համապատասխան միջոցներ ձեռնարկեն նշյալ ակտիվիստների ազատ արձակման համար։
Էմմա Չոբանյան
